年尾流流怪事多，好似愈升愈高嘅中國數碼信息（250），據聞大股東由12月起被債主斬緊倉沽貨，照傳統智慧，股價應該會勁跌，點解股價不跌反升呢？
經紀陳話，傳統智慧亦有句叫大戶出貨，愈沽愈高。經紀陳九唔搭八，搞到小初一頭霧水，收尾佢先至講出原因，原來有人在好多個月前，成功籌組一大筆資金，準備收番呢一手貨。小初聽完就更加一頭霧水，如果有人已經準備好銀両，何解唔去還錢反而要去收貨呢？
經紀陳話，小初對銀行及財務機構運作有所不知，原來有時債仔借咗錢還唔到，可以同債主有數講，即係有得「剃頭」，唔使還咁多。不過，債主若將股票掟出街，搞殘股價係一個大問題，所以點都要度水，準備收番齊批貨。
小初雖然知道，經紀陳收嘅料一向相當堅，但數碼信息股價由0.03元升到現時0.094元，累積升幅太大，再爆埋呢類利淡傳聞，短期股價表現都唔慌會太叻。
慕容小初