早前，我哋曾介紹過多部改裝奧迪TT，相信大家仍然記憶猶新；不過全部都係硬頂配搭嘅TTCoupe，或多或少會令不少喜歡TTRoadster開篷跑車嘅車迷感到失望。相信今日呢部外形包裝得美輪美奐，而性能表現亦有所提升嘅激改TTRoadster，定能滿足大家嘅要求呢！
記者：黃凱穎 攝影：陳偉林
車輛提供：TWAutosport（21420001）
呢部激改TTRoadster嘅車主，特別採用上一體式全車包圍配搭，令原本已極具流線型嘅TTRoadster，更增添有一份CyberFeel；另外，呢套Caractere包圍更有齊車頭整流器、門邊保護裙腳，同埋車尾整流器等等，再襯以18吋OZ跑車胎軨，望落可謂跑格十足。而最值得一提，就係Caractere嘅產品特別用上塑膠物料代替玻璃纖維，好處係有更佳防撞能力外，就算當行經一啲路壆或落斜時，都唔使擔心包圍部件會因碰到物件而碎裂。咁重唔止呀，車主重加裝咗特別訂做嘅ABT尾翼，形狀結構誇張之餘，行車時氣流更可由上下兩方通過，以增強車尾部份響高速行車時嘅穩定性㖭！當然唔少得重有JE-Design嘅尾燈罩啦！
車主為改善引擎吸氣量，故特別換裝上BMC高流量風隔，佢不單止能有效阻隔沙塵之外，就連吸氣聲亦頗為動聽，特別係安裝於TT嘅Turbo引擎之上，嗰股由車頭傳來嘅呼呼聲，絕對稱得上係駕駛時聽覺一大享受；另外，一套Supersprint跑車尾喉，亦能給予你有雄渾引擎嘅咆哮聲響，同樣令人深深被吸引住之外，而且重可以加快進入工作溫度，減少於排氣系統內所積聚嘅水份。懸掛系統則改換上KW特別設計嘅雙筒式可調校吸震系統，除能予人有頗高嘅乘坐舒適性外，亦可以營造出極佳嘅吸震能力呢！
雖然外觀上有大幅改動，但車廂布局則與原有型號相同，依舊以豪華舒適為主，所有設備如高級皮椅、原廠音響及冷氣等等全都一應俱全。然而，車主為增強一台1.8公升Turbo引擎嘅性能表現，故特別為其換上能令馬力輸出增至210匹嘅TW電腦晶片，匹配上原有一套5前速手動波箱，從而令起步加速可有更敏捷嘅反應；同時為保護進氣管道，車主更加裝咗Forge放氣Valve，呢款放氣Valve洩壓時只會連續發出低頻洩壓聲，唔會好似普通放氣Valve咁「吱」一聲將壓力放盡，此舉便可解決因收油過後洩壓過量，而導致車子有「腳軟」嘅情況出現。另外，車主更為座駕加上APEXiTurboTimer，不過由於TTRoadster嘅行車電腦與日本製Turbo車唔同，所以要經過特別接駁，才可與原廠防盜一齊使用呢！
奧迪汽車改裝專家Tony認為，由於TTRoadster嘅車身線條比Coupe版來得扁平，所以改裝時兩者會有所分別；特別係Roadster版車尾部份比較低矮，一旦裝上Coupe版嘅巨型尾翼，就會顯得有點格格不入，故此最好用上細小嘅尾翼呢！同時，以此車馬力輸出增至210匹，以及用上前輪驅動模式為例，改裝時亦要留意輪胎尺碼同懸掛設定，以增強行車穩定性呢！