八方上星期寫衞生福利及食物局常任秘書長尤曾家麗為洗雞籠而煩惱，點知激親尊貴嘅立法會議員黃容根，搞到黃容根發新聞稿，而各大傳媒又咁畀面跟進報道，真係受寵若驚，又好好笑。
事緣八方同尤太食晏，講到冰鮮雞能否冒充新鮮雞，尤太就有睇紅印之說，茶餘飯後閒談，竟招來議員怒批「享D8官俸，竟然對這點基本業務都不知」，「令香港成為冒牌肉商的樂園」，「有如此水平的官員，試問市民食物安全如何得到保障」。嘩，重以為佢鬧禽流感又殺到要殺萬幾雞，原來係講個印；好似小題大做的噃。
據黃議員篇新聞稿話，雞有急凍、冰鮮、新鮮三類；冰鮮雞有紅印，除可用作識別新鮮雞，也可防範急凍雞充冰鮮雞，尤太只講前一樣，所以就低水平，唔值做D8。八方睇完之後，都好驚自己唔識雞，於是見親有去買雞之師奶都問番兩句，問吓佢哋怕唔怕俾人呃？點知佢哋個個都話：係乜嘢雞，我哋一睇就知喇！
傳真︰2623-9278
電郵︰