年尾，明明是一年裏面的末日，大部份人卻很忌諱，不提末日字眼，改呼為除夕。於是大除夕、小除夕，eve、eve聲，避免聯想到末日。末日，字眼無彎轉，一看叫人滿腦袋蕭條、肅殺的影象。場景無可避免黑黑沉沉兼逢夜雨，甚至雷電交加狂颳冰雹，擺明不是賀歲片，絕不會無厘頭抵死搞笑，唔慌喜劇收場。
一年中有頭有尾，末日的悲情色彩濃烈，無得返轉頭。近代流行U-turn，一話無回頭，讓人聯繫到高架絕路。roadtoperdition，萬劫不復，絕徑掘頭，聽見都嚇窒，無心戀戰，壯志消沉。低迷氣氛循空氣散播，末日mood一蔓延，人人迷失方向，諸事失利，末日症集體病發，醫番都半殘廢。
所以，還是除夕夠中性，雖然明知時日無多，只差兩天，一年就此壽終；不過日子未能兩腳一伸正寢，仍舊要捱下去。沒法子，只能阿Q自慰，打起除夕的應景應節精神，自己搵自己笨說：明年會更好，香港一定得。
每年這時刻，我便模模糊糊記起年前有套拍得很曳的荷李活電影，中譯叫做《末日救未來》抑或《末日救地球》，不去管他了。末日奇蹟地搭住個救字，叫人醒神微振，唔，還有一絲希望。