NBA76人喺噚日作客輸畀爵士九十八比六十九分嗰場雙方鬥渣嘅低水準賽事，發生咗一段既恐怖又惡心嘅小插曲，就係打到第二節嘅時候，當爵士老將馬龍準備射罰球嗰陣，觀眾席裏面突然有人將隻真老鼠掟落嚟，啱啱就喺馬龍腳邊，佢隊友柏基特眼明腳快，立即將死老鼠踢開。賽後馬龍好定咁話隻老鼠嚇唔到佢，因為佢早見慣呢啲瘋狂球迷嘅變態嘢喎。
不過隻老鼠「出現」之後，76人嘅表現就差到離晒譜，全場命中率只有三成五（兩隊夾埋共射失一百球），大阿哥艾華遜只得十三分，平佢今季嘅新低，第三節中段重同成班主力俾教練布朗嬲到調晒返後備席㖭；而76人埋單得六十九分，亦係佢哋今季嘅新低。76人休息咗成個禮拜先打呢場波，照計好精神㗎，點知打到不知所謂，真係唔知佢哋係俾老鼠嚇親？抑或係放假玩到心散？
近排我哋嘅中國球星姚明打起波嚟欠咗啲勁度，冇咗之前嘅威勢，佢效力嘅球隊火箭又連輸三場，姚明嘅老爸見勢色唔對，話個仔未習慣咁頻撲打波，立即帶埋啲冬蟲草諸如此類啲中藥飛去美國探個仔，要同姚明「進補」；不過我就好懷疑啲中藥係咪咁有神效，不如火箭教練畀姚明唞，回一回氣先重好啦！
可能真係因為踢得太密，球員殘晒，前晚英超聯八場波得嗰十四個入球；有幾場都係響上半場已分勝負，落後球隊想追都無力，戰況平淡。惟獨修咸頓繼續帶畀球迷刺激，對新特蘭踢到補時至入波。我求大俠數過，修咸頓響呢個月總共有四場波喺完場前幾分鐘或者補時階段入波，呢份鬥到最後嘅決心真抵讚。
網球好手莎蓮娜今年真喺威到盡，贏咗三項大滿貫錦標，人紅自然驕，有傳聞體育品牌NIKE有意向佢招手，但莎蓮娜卻開價要八百萬美元一年贊助費。我求大俠知道大名鼎鼎嘅阿加斯都係收緊NIKE四百萬美元一年，𠵱家莎蓮娜係另一品牌PUMA嘅人，會唔會喺呢位大紅人嘅貪錢老竇出招，想喺合約即將屆滿，幫個女「托價」呢？
關心李鐵同埋孫繼海嘅波友請注意，佢哋兩個響前晚嘅英超齊齊有得踢，證明佢哋響之前一場無出場，主要係教練想畀佢哋唞吓啫。如無意外，佢哋會響元旦日愛華頓對曼城場波再交鋒，希望呢兩位國足精英到時踢好啲，當送份新年禮物畀我哋啦。呢場波收費台會直播，咪走雞。