聖誕假期留港消費，自不然要去馬場做善事。拆禮物日跑馬，頭兩場就開晒啲熱門，獨贏連贏都冇分頭，好似左丁山呢類小注怡情之人，中咗都唔慌贏錢。張基講得過癮，佢現場評述話：「嗱，派咗兩場聖誕禮物喇，會唔會場場都有禮物收呀？睇真啲至好。」果然，到咗第三場，竟然爆巨型大冷門，百幾倍嘅「勁湧」居然突然狂勇，入直路衝上嚟，重碰親左丁山買咗全餐嘅「利是吉祥」，與「百勝福星」串Q，派彩一萬五千幾，左丁山冇得中，馬主暈得一陣陣。
輸咗呢一場，運氣冇晒，連場敗北，只見來自澳門嘅靚仔法國騎師蘇銘倫愈戰愈勇，真係幾犀利噃，點解其他法國騎師巫斯義、冼毅力、杜利萊、李格力就好似冇厘神氣咁呢？杜利萊重因身體不適，退下火線㖭。此時惡佬明出現，叫我唔好捧法國佬場，問佢點解？佢話：「我喺第四場開賽前，投注「正印」拖「快利高」、「最容易」，所以好緊張騎師動態，入閘前，吳嵩講馬之際，電視鏡頭竟然影住冼毅力幾秒，你估佢做乜？冼毅力騎住隻「快利高」打喊露呀，我惟有搣飛啦。」
又幾好笑，騎師陣前打喊露，多數係聖誕平安夜及聖誕節玩得好過癮，而且多數係成班鄉親一齊玩㖭。點解蘇銘倫又如生龍活虎？惡佬明話：「可能係新嚟，未有朋友，鄉里都唔識呢！但見佢爆『勁湧』之後，過關飛咁勁，都唔好睇小啲馬交friend嘅力量！」這個當然，第四場蘇銘倫騎「好時機」，馬主包括何世柱、蘇慶和、梁陳月明等人，都唔會係大注之人，過關飛應該與佢哋無關嘅！