一個「私」字，再加一個「房」字，就知這種菜式煮的是不出閨門的自家口味。閂埋門玩低調都依然客似雲來，道出了私房菜的一大誘惑：吃廚師的手藝。老實說，幫襯只為趕潮流的「私房菜館」，倒不如找一般餐廳醫肚罷了，反正水準相若。唯獨以下介紹幾位名廚，堅持親征，而且收費並非開天索價，你我都有機會親嘗達官貴人、甚至連英皇室都吃過的真正私房菜！
記者：吳佩璇
攝影：梁細權、黃叔榮
85年中英草簽，英方宴請中方，鄧小平就食過鄺師傅這味招牌菜。食完重專誠走入廚房同鄺師傅握手，大讚好味。鴨內主要釀入蓮子，並非甚麼珍饈，但就又燜又炸整成3個幾鐘，靠的是一份心機。
11歲入陸羽、12歲到龍鳳茶樓，由做點心學起，轉眼入行45年的鄺炳均師傅，一句「做酒樓冇出色」，18歲便跑去政府機構做廚，到70年代更走進港督府，服侍過戴麟趾及麥理浩。74年英女皇訪港，吃過鄺師傅的手勢，大讚餸菜腍夾滑。幾年後，誰知英女皇仍念念不忘，索性請鄺師傅到白金漢宮：「嗰陣淨係知去公幹，連去邊都唔知！」皇室上下，如瑪嘉烈公主，都飽餐過師傅的一頓晚宴。
曾面對許多達官貴人，鄺師傅卻出奇地靦覥，種種經歷都要死纏爛打才吐幾句。現時他正職為何鴻燊旗下一會所任廚，只周日才走到黃色門獻技。一星期做足7日，鄺師傅仍帶笑道：「我好鍾意入廚房，一啲都唔攰。」
當年戴妃訪港，鄺師傅上皇室遊艇號當廚，戴妃竟一口氣吃下6件珍珠雞，直至師傅跟她說：「小心太滯。」大廚的功架大概就在這裏，平凡的珍珠雞還不過是雞蛋、冬菇、江瑤柱，但就出奇地好味。非要親口一嘗才知箇中滋味。
只兩、三吋長的獅頭魚，鄺師傅都花心機逐條起骨。魚肉又滑又細緻，味道鮮甜。葉漢晚年冇牙，最愛就是這道菜。
黃色門
電話：28586555
地址：中環閣麟街37號6樓
供應時間：鄺師傅逢星期日晚上7時開始，星期一至六則供應四川菜及上海菜。
收費：星期日4位起，每位$250/8道菜連甜品點心；星期一至六2位起，每位$200。
認識于燕平師傅，相信是年前跟前財政司司長曾蔭權的一番風雨。後來還出書《驚心動魄303天》，大吐在前財爺官邸當廚1年的種種苦況。去年年中，跟政府的官司勝數後，拿着一筆錢開了自家的私房菜館。但問他為甚麼有意做私房菜，于師傅單刀直入：「係畀政府迫出嚟嘅。同司長搞成咁，消防、懲教、立法，冇個部門肯In我。連中華廚藝學院都唔請我。」最近他更推出特區宴，繼續一貫敢言作風。
「特區宴」12道菜的菜名，都抓緊時事，反而不知菜式是雞是鴨！像這道鬧得熱烘烘的23條立法湯，說穿了其實是一煲魚湯。師傅今日用了桂花魚，但重點是將魚蒸熟後，再去皮拆骨，並用手把魚肉搣絲，寓意23條一旦立法，香港人誓必粉身碎骨。
煮這個菜只用雞蛋、甘笋、雲耳等普通材料，但絕對是工夫菜，要於50秒內將所有材料落鍋炒起，手勢、火候、落料都要拿揑得好準確。出來的味道，竟就如吃蟹粉。諷刺三司十一局往往都充大頭！
于師傅話風聞董伯伯鍾意食元蹄，便用南乳汁代替豉油煮元蹄的方式，以示效忠。做元蹄好花工夫，又蒸又燜又焗，要整五個鐘。而元蹄乃豬腳，師傅話用來比喻董伯伯，暗罵香港現時乃用腳投票！
于師傅樂廚坊
地址：炮台山英皇道147-151號萬事昌大廈4樓D
電話：93271903
供應時間：每晚6時開始
收費：8位起，$238/12道菜。
董家菜早就打響名堂，62歲的董師傅入廚46年，最為人熟悉是曾任中環寧波旅港商會中菜部廚師達20多年，煮得一手撚手上海菜。4年前受裁員牽連，輾轉開了這家私房菜，至今年半，高峯時要成半年前訂枱。賣的是對菜式的一份堅持，今年6月，董師傅因病入院，他寧願延遲Booking，停業兩月，也絕不肯為賺錢而假手他人。自家做菜，董師傅不只做上海菜，而是更闊的淮揚菜，八寶鴨和菜肉包都是其拿手好戲，更有香港第一包的美名！
他的菜肉包有香港第一包的美譽，這個蟹粉包也不差到哪裏去。包皮仍是他古法自家搓製，鬆軟彈牙。蟹粉乃正宗陽澄湖出品，不用味精，只用滷雞、火腿、鵝汁等吊味，好味得一口氣可食3、4個！
先替鴨拆骨，再於鴨頸開個小窿，釀入鴨肉粒、火腿、冬菇、瑤柱、蓮子等等，豈止八寶！然後慢火燜它4、5個鐘，前後得花5、6個鐘才完成，乃必食之選。由於極花時間，所以至少1日前預訂。
將去骨黃魚塊夾着一片火腿。火腿的惹味被魚肉吸收，渾然為一，清甜中帶鮮肉味，既香且滑。
董家菜
地址：中環士丹利街60號明珠行2樓
電話：25715168?92174306
供應時間：中午12時至2時半，晚上6時半至10時半。
收費：午巿接受散叫，四、五十元可以落樓。晚市設有4人、6人、12人等各類餐單，平均每人約$200。
在香港，私房菜追溯至60年代的退休媽姐，她們將畢生在名門中入廚的經驗，搬回自己屋企，煮幾味宴客。發展下來，私房菜指的是沒餐牌、沒招牌、沒Walk-In，吃的是廚師手藝，並多躲在上樓住宅的小本經營。