聖誕新年假期，大把人出外旅遊，打工仔只要攞到27號星期五一日假期就可以放足五日，咪話唔爽。但另一方面，有好多朋友留港消費噃，BoxingDay喺馬場撞到唔少人，佢哋問左丁山點解唔出外，左丁山又問佢哋點解唔出外，答案只有一個：就係啲仔女自外國回港度假，而啲仔女返到香港就想搵舊同學玩，唔多鍾意出外旅行。
左丁山嗰代嘅留學生，每逢大假期就去大城市搵工做，做到隻唧咁，希望托餐攞貼士，幫補學習費。嗰代留學生返嚟香港之後，食住經濟起飛條水，大多撈得唔錯，最夠運者發晒達，老老實實者都成為中產以上嘅階層，到咗佢哋啲仔女去做留學生，緊張咯，邊捨得畀啲仔女去紐約、洛杉磯做侍應捱苦吖，一定叫晒佢哋返嚟，名為團聚，實際就係為咗讓仔女嘆世界。
左丁山與賓架W都冇留過學，前年賓架W個女唔肯返嚟放暑假，話要去打工見識吓，做完餐廳就做麥當勞，負責廚房清潔，搞到賓架W太太非常肉赤，好怕捱壞個自小俾賓妹湊大服侍慣嘅嬌嬌女。點知個女又捱得，返到嚟，變得獨立咗，冇咁易發小姐脾氣㖭，而且知道好多蠱惑招數，唔再係溫室裏嘅玫瑰。賓架W非常高興，話「美式在職訓練」係大學教育嘅完整部份喎！