噚日八方同大家提過，周德熙太太黃英琦全力推介嘅兒童音樂劇《來自巴巴星的王子》，因為呢套劇係由佢喺九八年創辦嘅香港兒童音樂劇團演出。八方估唔到Ada（黃英琦洋名）真係咁投入，前晚一去到理大首映場地，就見到Ada企喺門口打點，攞咗場刊，發現印刷精美之餘，重有埋Ada小女孩時嘅照片。
由照中可見，Ada細細個已經生得精靈可愛，面圓圓又愛笑，個樣望落同𠵱家冇乜大轉變。點解Ada要貢獻埋自己嘅童年照？原來講開有段古，話說套兒童劇講到嘅巴巴星人，同地球人啱啱相反，年紀愈大外表愈年輕。所以Ada特地在場刊中登出自己嘅童年照，重加上說明：「Ada姨姨在巴巴星的近照」。八方估如果真係有個咁嘅巴巴星，好多地球女士會爭住移民去。
黃英琦喺場刊中《Ada姨姨的話》講到何謂教育，都算別出心裁，佢認為舞台經驗係全方位嘅教育，一來小朋友要學念對白，清晰表達意思，二來要排舞，要付出體力，三來要參與整個漫長綵排，學到恒心毅力，四來要學同別人合作，更加要學執生同克服怯場嘅恐懼。
傳真︰2623-9278
電郵︰