電影《魔戒》系列入面，飾演以弓箭做武器嘅精靈族王子勒苟拉斯嘅奧蘭多布魯（OrlandoBloom）確實冧死唔少女影迷，佢憑《魔戒首部曲：魔戒現身》嘅出色表現，喺英國電影大獎攞埋「最佳新人」。
唔講你唔知，原來奧蘭多喺五年前已經拍第一套處男作、講述大文豪王爾德（OscarWilde）生平嘅《心太羈》（Wilde）。
話說奧蘭多喺《心》片裏頭，飾演一個周街向獵物兜搭嘅同性戀紳士，喺佢出鏡嘅短短分零鐘，一時向王爾德拋眉弄眼，一時又回眸淺笑，真係可以話「嬌媚動人」，同今日英氣十足嘅佢差得遠，睇到我羅拉有啲毛管戙。查實奧蘭多當年拍《心》片時只得十八歲，啱啱喺藝術學院畢業，睇番佢當日嘅幼嫩演技，我諗冇人估得到佢會跑出。
此外，有美國男同性戀網站又話，伊利亞活（ElijahWood）同辛艾斯甸（SeanAstin）係《魔戒》嘅「好友」關係充滿同志特色，加上飾演巫師甘道夫嘅伊恩麥基倫（IanMcKellen）早前又大方承認自己係同性戀者，唔怪得之睇《魔》嗰時總覺得妖味十足！