聖誕節期間，好多藝人都鍾意約埋班朋友去蒲吧，噚日馮仁昭去咗中環一間酒吧同朋友傾偈，原來間酒吧聖誕嗰晚就發生藝人打交事件。
有位半紅不黑嘅前組合歌星同班朋友飲到好high，嗰晚因為人客太多，好容易有碰撞，半紅不黑嘅歌星咁啱俾人撞倒，佢就喺度發癲，同人嘈起上嚟，後來重發展到郁手郁腳。
當場已經有人嚟勸交，因為歌星一向飲醉酒就會發癲，所以朋友都勸佢唔好再同人嘈。點知佢癲到打畀轉咗行嘅女星老公班馬，個女星老公係警察，聽到一個咁嘅電話都知老婆個朋友一定係飲醉咗。
警察老公當然冇幫歌星班馬啦，但佢都落咗去酒吧睇吓發生乜嘢事，見半紅不黑歌星只係同人打拳頭交，惟有拉住佢走人啦！
喜劇紅星同某破產商人反面，好多人都唔知因乜事，其實都係為咗好少嘅利益問題。話說喜劇紅星學識飲紅酒後，就學人買啲成萬蚊嘅紅酒嚟飲，後來唔知佢為乜要將其中一箱咁貴紅酒擺喺商人間公司，後尾箱紅酒俾人偷咗，佢哋都明知係個秘書偷嘅，但喜劇紅星係都要商人賠償，商人覺得唔關佢事，冇理由要佢認數，小器嘅喜劇紅星就因為咁同商人反面。
李玟噚日着住毛毛領大褸，攞住Dior手袋同媽咪一齊出現機場。
問着得一身貴氣嘅李玟同媽咪去邊度？佢話：「我去上海，要出席新天地嘅除夕倒數晚會，因為上海都好凍，得幾度，所以我着咗五層衫。」李玟臨入閘前都不忘同記者講新年快樂。
某電視小生雖然死都唔認自己有婚外情，但馮仁昭早幾日同朋友飲茶，講起呢個小生。其中一個朋友話幾個月前嘅一個下晝，佢喺山頂飲茶，咁啱就撞到電視小生同電視花旦兩個嚟撐枱腳，可能因為係下晝，餐廳唔係好多人，但佢兩個都係明星，當然俾人認出，嗰陣佢哋兩個重一齊拍緊一套劇，喺戲入面做情侶，唔怪得佢哋嘅感情戲做得咁鬼自然啦！
盧巧音噚日喺奧海城出席「盧巧音英倫奇想之旅」，盧巧音嘅前男友余文樂俾張堅庭批評咬字不清，盧巧音話：「𠵱家啲香港人講嘢好多懶音，係應該改善吓，習慣有懶音就好難改，好彩我細個時屋企教得好嚴，講嘢唔正會俾人鬧。至於話陳冠希講嘢唔正，我就覺得情有可原，因為佢講慣英文，其實大家知佢講乜咪得囉！」
葉玉卿同老公胡兆明又再添丁，第三胎喺呢個月二十號（美國時間）出世，重五磅幾，比預產期早咗兩個禮拜有多。今次卿卿生咗個仔，都算提早送份聖誕禮物畀老公，BB個中文名就未改，不過英文名就叫Jefferson，個樣似爸爸多啲。
薛家燕（好姨）獲委任為出年嘅「滅罪之星」，佢噚日就喺觀塘宣揚有關訊息，向途人派發宣傳單張同揮春，現場吸引咗百幾名巿民圍觀，場面一度混亂。
好姨所到之處都搞到水洩不通，而好姨就希望巿民挨年近晚，要小心防盜，以免被賊人有機可乘喎。
郭可盈最近喺內地接咗唔少剪綵工作，為佢帶嚟可觀進帳。
聖誕節期間，可盈喺順德同珠海剪綵，其中順德嘅一間女子俱樂部重提供免費美容同健身服務畀可盈，等佢可以享受一吓。除咗做嘢之外，可盈重約咗一班好友喺屋企開聖誕派對，聯絡感情。
陳淑蘭（蘭子）最近跟拍拖兩年嘅工程師男友William分手，男方近日重開始喺跑馬地另覓新居。
至於佢哋分手嘅原因係William曾多次向蘭子求婚，但係蘭子都拒絕，不過蘭子媽咪就好鍾意William。平時呢對小情侶咁恩愛，分手都幾可惜。