如果大家有留意我哋《車天車地》版「Mark哥有料到」一欄，又或者係昨日各大報章的話，相信都應該知道唔少關於大發汽車嘅香港代理權，將於明年1月1日起轉到皇冠車行手上嘅消息。
而昨日豐田代理皇冠車行，以及大發現任香港代理嘅大發汽車（香港）有限公司，於各大報章刊登嘅聯合啟事中指出，由明年1月1日起，皇冠車行將取代大發汽車（香港），成為大發喺香港嘅汽車、零件及配件嘅獨家總代理；同時，亦會向大發汽車（香港）於2003年1月1日前出售嘅大發汽車、零件及配件有效保證提供所需嘅服務，而兩間分別位於灣仔告士打道，同埋九龍窩打老道嘅陳列室，亦會於皇冠車行接手後繼續營業。如果各大發汽車顧客有任何疑問，可致電28801388查詢有關事宜。
雖然早前皇冠車行及大發汽車（香港），並未有對代理權易手一事表態，令一眾車迷擔心大發響香港代理權嘅去向；但昨日所發表嘅啟事，相信會令不少車迷放下心頭大石，皆因以皇冠車行嘅人力物力，為大發汽車嘅用家提供各項銷售及售後服務，都勝任有餘，而大發汽車（香港）則會專注澳門及國內嘅業務，相信亦會有無限嘅市場空間呢！