美國佬對伊拉克啲石油虎視眈眈，近個幾月嘅期油價格升到「巴巴聲」，照傳統智慧，油價升對所有石油股都會有好處，不過香港嘅石油股就唔行呢一套，唔知呢啲係港股嘅特性，抑或係班大戶大玩挾倉，令到幾隻原本好有上升潛質嘅石油股，都無辦法突圍。
不過啲石化股嘅走勢就啱啱相反，升完一輪又一輪，聽班行家講完全係班炒家嘅所為，尤其係隻中石化冠德（934），股價已經由早前7毫子，升到去上星期五最高8毫1。據聞隻股升得咁勁，完全係因為市場上班基金現金過剩，要搵一啲唔輸得嘅股票嚟買，於是就揀咗呢排升勢好勁嘅石化股，冠德更加係首選。
不過伏勝亦聽到有另一班原本揸咗貨嘅大戶蠢蠢欲動，開始想沽貨走人，而且已經定咗個止賺位喺8毫5，即係話重有7個價位左右，如果各位重未上車，就千祈唔好亂嚟。
上個禮拜中移動（941）同聯通（762）咁，俾啲大行話中電信（728）推出新服務下，會影響兩間移動電話公司嘅收費，結果被推低兩成三同埋兩成六。
睇番個公布，伏勝覺得影響未必會好大，尤其係移動電話嘅作用仍然係以室外使用為主，加埋用戶要花多三千幾蚊嚟用個新服務，計番條數其實未必咁抵，所以伏勝認為兩隻股份被大戶「造低」，主要都係要推低期指嚟轉倉又或者食胡，可以話同個新服務冇乜直接關係，所以有行家同伏勝講，如果兩隻股份都跌低啲，班專做套戥嘅炒家可能又會出番嚟，所以下個月呢兩隻股又可以買過。
伏勝