前大法官楊鐵樑自退出行會後，已好少理政治江湖事，噚日政府宣布，新一屆授勳事務委員會委員名單，楊官個位由工聯會會長鄭耀棠頂替。年前老董頒發大紫荊畀六七暴動幕後黑手楊光，呢個委員會受到唔少批評，後來發覺最後拍板者係老董，楊官成班人先至唔使揹鑊。
雖然楊官年過七十，但由於法官形象正直，老董搵佢處理過幾單棘手嘢，包括港大民調風波同睇實官股嘅外滙基金投資有限公司主席，𠵱家官股賣得七七八八，都係楊官功成身退嘅時候囉，今次退埋授勳委員會更加甩難，遠離是非地，可以多啲時間陪愛妻，優優游游過退休生活。
八方聽講，楊官近排經常現身上海，同老妻四圍飲飲食食，楊官喺上海出世同讀大學，怪唔得咁鍾意返鄉下歎世界啦。
傳真︰2623-9278
電郵︰