最近，EuroNCAP（EuropeanNewCarAssessmentPorgramme）公布咗最新一份撞擊測試報告，當中多款用作測試嘅汽車都獲得頗高評分；今日我哋就為大家帶來，其中四款房車嘅測試報告，而平治E-Class、雷諾MeganeⅡ及紳寶9-3，都獲得唔錯嘅評價。想買車嘅朋友，不妨用呢份撞擊測試報告作為參考吖！
記者：郭信強
註：假人公仔上嘅顏色，代表車子對乘客嘅保護程度。
正面撞擊及側面撞擊保護評級：★★★★★
正面撞擊保護評分：14
側面撞擊保護評分：18
整體分數：33
同樣未正式抵港嘅雷諾MeganeⅡ，模擬以時速64km/h正面撞向障礙物時，設於前座嘅兩段式安全氣袋，能充份保障乘客安全外，用作測試嘅型號更設有駕駛者嘅重量感應器，能對應駕駛者重量而調節安全氣袋嘅充氣度，以減少因安全氣袋彈出時而造成嘅傷害；而堅固車架結構，亦減少咗因表板及腳踏等配備於意外撞擊後，壓向駕駛者嘅機會。同時，車上嘅側氣袋及充氣簾幕，當車輛模擬被時速50km/h嘅汽車攔腰撞及時，全都能於短時間內彈出。難怪響進行側撞測試時，能夠獲得滿分嘅評價啦！
正面撞擊及側面撞擊保護評級：★★★★★
正面撞擊保護評分：13
側面撞擊保護評分：18
整體分數：33
雖然新版紳寶9-3尚未正式抵港發售，但響是次撞擊測試中所獲得嘅評分，就予人有十足信心；當模擬以時速64km/h正面撞向障礙物時，安全帶能將前座乘客牢固於座位上，而安全氣袋亦能於意外發生後嘅短時間內彈出，從而帶來充份嘅保護；不過，軚盤及腳踏或會於意外後壓向駕駛者，導致腿部及腳部受到不必要嘅傷害。而響側撞測試時嘅評分亦見不俗，皆因側氣袋能於意外發生後瞬間彈出，而充氣簾幕組合亦增強咗對乘客嘅保護度呢！
正面撞擊及側面撞擊保護評級：★★★★★
正面撞擊保護評分：13
側面撞擊保護評分：18
整體分數：33
新款E-Class自推出以來一直備受車迷追捧，相信除咗因為賣相吸引及設備齊全之外，對車上乘客所帶來嘅周全保護，亦為賣點之一；當模擬以時速64km/h正面撞向障礙物時，車上安全氣袋全都能及時彈出，而堅硬車架結構亦能充份保護到車上乘客嘅安全，從而令受不必要創傷嘅機會減至最低。不過，駕駛者左腿於意外發生後，有機會與中控台發生碰撞，可能會造成不必要嘅傷害。至於模擬被時速50km/h嘅汽車攔腰撞及時，側氣袋及充氣簾幕亦能於瞬間彈出，可充份保護到乘客㗎！
正面撞擊及側面撞擊保護評級：★★★★
正面撞擊保護評分：12
側面撞擊保護評分：17
整體分數：29
剛抵港嘅日產Primera，響進行模擬被時速50km/h汽車攔腰撞及嘅側撞測試時，充氣簾幕未能完全充氣彈出，對後排乘客雖有周全保護，但前座乘客卻可能因而受傷。至於模擬以時速64km/h正面撞向障礙物時，安全氣袋雖能及時彈出；但喺測試時，充當乘客嘅假人未能命中「目標」（即安全氣袋），可能會受到不必要嘅傷害。幸而，車架結構於撞擊後未有嚴重損毀，故仍能為乘客提供頗高嘅保護度。