先覆兩位讀者。劉小姐問邊度可以買到《五常法》，佢搵咗好多書局都搵唔到。對唔住，左丁山略知五常法，但唔知《五常法》呢本書可以喺邊處買，幫你唔到。
詩薇讀者問如何為女兒申請美國大學獎學金。美國獎學金，以成績為主，首先要成績好好先，但外國人讀州立大學，得獎學金嘅機會好微，須有心理準備，左丁山已請朋友代尋申請機構，搵到就會轉告。
平安夜放工回家之際，喺中環馬莎百貨門口碰到一位上星期日（二十二日）到維園支持基本法二十三條嘅作家L，佢問我支唔支持，左丁山話：「各有立場，各自表述，意見不同，仍是朋友！」作家L有一份正職，就係某機構幹事，佢哋嘅老闆、主席，響應挺董挺法，班齊人去維園，作家L不能不去，食人五斗米，你估咁易側側膊乎。
作家L話當場所見，唔少球場內高叫口號嘅人就係九七前攬到英國佬實嘅人，當年反共反左，如今愛國惟恐落後，真醒目也。作家L混在人群中，百感交集，好不容易捱到老細肯鬆人，正想走得快，好世界之際，俾老細喝住：「喂，場面咁感人，給反中亂港派好看，你要寫吓文章，支持保安局，支持立法至得！」好彩作家L枝筆叻到識轉彎，寫乜嘢題材都掂，一於頂硬上。作家L問左丁山是否識唱：「為兩餐乜都制呀，皇帝！」成首歌就唔記得咯，要搵番許冠傑隻碟至得。