講開慈雲山，同事們好奇問：「有無扑頭黨㗎？」邊有咁恐怖？我承認慈雲山好低調，因為無地鐵無大商場，但講開街坊平價食肆，慈雲山消夜實叫你食指大動。天寒地凍時可到老字號煲仔飯店，暖暖身心；愛啤一啤的可到海鮮飯店，炒幾味；想坐得較舒服，就到客家酒樓食特價菜，柯打四道菜埋單不過一百，並非只因逆市要賤價，而是做街坊生意之道：「老實君真。」
記者：楊一凡
攝影：陳陶鈞、陳智良、伍慶泉
高峯期一晚做萬五蚊生意，受歡迎因為煲仔飯口味多，臘味以外有梅菜肉餅、南乳豬手及薑葱魚腩；25年來不斷改良的煲仔飯豉油，亦是重點，好些熟客還想買一瓶回家慢慢歎。負責煲仔吧的通哥試過獨力煮二百幾煲飯，忙得就算燙傷也唔知痛，眼尾見店外排長龍，眨眼間店裏吃得煲底朝天，滿足感油然而生，動作更勤快。今日的巿道已無呢支歌仔唱，但老店仝人相信：「慢慢嚟啦，總會變番好。」
蒸三色水蛋 $20
金針雲耳蒸滑雞 $26
兩款小食拼盤 $20
臘腸排骨煲仔飯 $34
埋單： $100
梅園麵家小廚
電話：23230118
地址：鳳凰新村銀鳳街22號
營業時間：朝11時半至下午2時半，下午5時至凌晨1時。
晨早飯店坐滿老人─舊區的開荒牛，他們摯愛鮮有的鵪鶉蛋燒賣。下午由學生哥及工人接棒，因為一大兜例飯才二十幾，下午茶十幾蚊又一大碟。晚上顧客以的士司機及旺角蒲精居多，大家知道當時鐘踏正晚上9點半，廚房就有多兜筍嘢出場，十二蚊碟，避風塘或薑葱炒花蟹及瀨尿蝦，炒蜆及京都醬雞翼等，消夜時柯打$68兩餸湯羹配白飯套餐，再加碟12蚊特價小炒，埋單$80，抵食到翻尋味。
兩餸一湯跟白飯套餐 $68
避風塘炒花蟹 $12
(9時半後)
埋單： $80
金麟飯店
電話：27264205
地址：鳳凰新村環鳳街28號
營業時間：24小時通宵營業
新加入夜巿的客家酒樓，五人或以上幫襯晚巿，可以一蚊食一隻東江雞，四人或以下一蚊半隻；另各式小炒原價$35，八點半後特價$28，迷你煲仔飯份量如白飯碗，五蚊一小煲，咁多優惠可以同時享用。曾經理誠意推薦$298雀局套餐，四餸一湯白飯任裝，兼打到天光。天光？又話營業至12點？曾經理豪爽笑說：「我哋收工拉大閘，雀友可繼續開工，打到天光咪推閘走囉。酒樓無值錢嘢，得部爛鬼電視，要咪抬去囉。」
東江雞 $1（晚巿)
梅菜扣肉煲 $28（8時半後)
客家煎釀豆腐 $28（8時半後)
竹笙冬菇 $28（8時半後)
迷你煲仔飯 $5（晚巿)
埋單： $90
恒運火鍋海鮮酒家
電話：23234283
地址：鳳凰新村環鳳街33號
營業時間：朝5時半至午夜12時
在小巴站對出的沙田坳邨食檔，有車仔麵、粥品、包點和糖水等，格局地踎，當中以開業十幾年的廣興至為熱鬧，三餸車仔麵$14，豬皮夠入味，招牌牛雜日賣過百串，雖然裝修宣傳欠奉，但日夜煮不停；麵店後的糖水店，幾蚊有交易，食餐飽不過$30。
招牌牛雜$30
牛雜索滿一身湯汁後變得軟熟，趁熱逐塊送入口，細細咀嚼，味道濃郁的湯汁慢慢流進牙縫，無怪乎大人細路都愛吃。
廣興麵店
(23206527)
地址：沙田坳邨7161地段
想起擔擔麵，想到美味齋，湯底不是稠如漿，但卻有花生香，麵身薄又滑，吃入口幾乎自動跣落肚，埋單$18，其他香辣小炒35蚊起；店內的廚師似教書，個個文質彬彬。
美味齋（23272692）
地址：鳳凰新村環鳳街19號地下
甫進店感覺乾淨整齊，進進出出的學生們都相當有禮。畀$25可以成為漫書店永久會員，會員可以$4至$5租漫畫書或長篇小說如《哈利波特》及《藍色生死戀》等。而會員即場閱讀全日任睇收$14，非會員則頭半小時收$7，之後每一分鐘$0.2。
書識店（29945411）
地址：鳳凰新村銀鳳街19號安達樓閣樓
各式圖案機殼齊備，手機繩只賣五蚊的手機舖，集齊大量二手機，舊款機如Nokie6150、7110及PanasonicGD98都有，這完全是為了迎合舊區手電巿場需求。
鳳凰電訊（23234898）
地址：鳳凰新村環鳳街40號至44號地下
負責理髮的師傅從上海而來，來港一年，全年無休，但感覺踏實。若顧客頭髮柔順的話，一小時可剪五個髮，因為整天要手持剃刀兼站着剪髮，故此店裏的兩位女師傅身形都很苗條。
上海經濟理髮店
（23055049)
地址：沙田坳道108號
若然你在中環旗袍店睇中靚裙，這裏可能會有貨，而價錢是中環的五折，因為中環某些店舖亦在這裏落單。店主在廣州學師，後在大陸設廠，成本較低，故度身訂做的繡花棉襖只要五百幾，最快兩星期起貨。
多利多服裝公司（23221885）
地址：鳳凰新村銀鳳街2B地下
老闆近期力谷彈弓床褥，3呎×6呎賣$398，而4呎×6呎賣$498，價錢約巿價四折，點解咁平？因為老闆主攻床和褥的生意，共五間分店，故可拉低成本。
床褥直銷店（23213178)
地址：鳳凰新村環鳳街56號地舖