曾經係過去兩年嘅深圳站奪得冠軍嘅香港「阿寶」，喺大陸好受歡迎。好似噚日攞完個「勇敢獎」後，大批市民就想近距離同佢攞簽名，「阿寶」為咗脫身，臨時諗到將大會送畀佢嘅鮮花向台下觀眾拋落去，果然成功甩身。
每年喺深圳龍華鎮採訪單車賽，都覺得啲市民好似唔使返工做嘢咁，晨咁早喺賽場就會出現萬人空巷嘅場面。噚日諗住氣溫凍到得番五、六度，重落埋雨，以為無乜人睇比賽啦，點知喺比賽前四十分鐘去到賽場，一大班市民已經企好位等睇比賽，做車手嘅踩都踩得開心啲啦！
噚日兩個多小時嘅比賽中，差不多未停過雨，苦了一班無遮無蔽嘅車手，不停淋住雨比賽不特止，加埋途中不少凹凸不平嘅路；積滿污水後，到車手踩過時，污水四濺，搞到啲車手變晒花臉貓。代表亞洲馬可孛羅隊嘅香港梁氏兄弟──梁志恒、梁志賢返到終點時塊面污糟到差啲認唔出嚟。