大市靜如深海，早已預咗，成交僅28.7億元，係今年全日市的第二最低紀錄，家下好多芬佬重放緊長假，下禮拜初嗰日半市，睇怕又係得個悶字。
2003年元旦日，亦係農曆11月底，踏入農曆12月，大市有否起色，就要睇呢個月跌夠未，若果未跌夠，可能要捱多一兩個禮拜都未定。
唔係導人迷信，有時真係唔到你唔信。高人話農曆5月同6月股市大散，結果搞出個細價股股災，唔少股仔跌到七零八落，散戶元氣大傷；農曆11月亦唔掂，不宜揸貨，果然初一就大跌231點，一路到𠵱家都冇起色，最叻嗰日都只係起得70點。
噚日個市，由頭跌到尾，恒指跌到9426又創出今次調整市新低，收市9445，跌116點。由初一起計，到噚日低位，恒指一共跌咗754點，若照高人所講，呢個月要跌千零點，即係要落到9000邊緣，則唔排除下禮拜初重會有更低嘅指數出現。
國企股仍好強，但趨向個別發展，每一類股份都有升有跌，公路股就好咗滬杭甬（576）、江蘇寧滬（177）同安徽皖通（995）；電力股就升山東國電（1071）；石化股仍係上海石化（338）一路有大盤扯吸，而北京燕化（325）同鎮海煉化（1128）亦不俗；至於原料股的兗州煤業（1171）亦有進帳。
內地整治煤炭行業，對大公司例如兗煤等特別有利，兼且近期煤礦市場求過於供，煤價穩步上升，預期未來幾個月石油價格會企於高位，也會令煤炭需求更為殷切。
今年1至9月，兗煤主營業務收入59.4億元人民幣，上升23.2%，淨利潤8.43億元人民幣，大增46%，每股盈利0.29元人民幣，預料公司今年實際銷售將超出目標，預計02年全年盈利可達12.5億元人民幣，上升28.9%，每股盈利0.43元人民幣，預測PE7.4倍，息率約3.5厘，股價仍有上升空間。
由7月開始，兗煤走勢形成複式頭肩底，突破頸線2.95元阻力後，完成後抽，以量度升幅計，股價在明年首季可見3.5元。
郭兆誠