張耀揚同社交界靚女艾永玲分咗手之後，艾永玲男友已經換完又換，相反張耀揚一直冇新戀情傳出，唔通對舊女友重未忘情？
話口未完，張耀揚噚日終於俾傳媒發現有新女伴，但係張耀揚就好避忌，發現有記者，竟然自己揸車走先，撇低女伴。
噚日凌晨十二點幾，張耀揚同一個長頭髮嘅女伴去咗跑馬地頂好粥麵撐台腳，佢哋一入舖頭就坐埋去最角落嘅位，唔想咁高調。張耀揚同女伴離開時，發現有記者喺餐廳出面等，兩人即刻縮返入舖頭入面，商量一輪之後，張耀揚一個人行出嚟，揸車離開。
五分鐘之後，女伴喺粥麵店職員安排之下，行後門走人，職員重幫女伴截咗架的士。張耀揚個女伴見到記者影相，不停遮面。馮仁昭真係唔明，張耀揚咁大個人，拍拖都好正常啫，有乜嘢咁大不了？要搞到咁唔見得光？
梅小惠（右）出咗本新書《學小惠推脂》，噚日喺尖沙嘴開記招，請埋老友曾華倩（左）、江欣燕同屋企人去助威，佢自己就更加博，氣溫跌到得幾度，都要捱住凍着吊帶低胸裙，重係前兩日新買嘅。小惠話：「冇法啦！本書講推脂，梗係要騷吓身材畀大家睇。」佢重大方公開自己三圍數字34D、25、35，體重有一百二十磅。
新人關心妍（Jade）同蕭正楠合唱嘅《特別鳴謝》，由佢哋嘅偶像陶喆監製，所以早幾日錄音時，佢兩個好鬼緊張，拖慢咗進度，要陶喆再嚟香港一次。
Jade同蕭正楠重為今次錄音而有拗撬，佢哋各執己見，重要陶喆調解。不過，Jade同蕭正楠本身係老友，咁小事絕對唔會影響友情嘅。
呂方前晚去灣仔睇《情迷個半月》首映，知道佢老友杜德偉涉嫌藏毒，呂方話：「我聽見都好驚訝，都唔知真定假，希望佢冇事啦，我會打畀佢問候吓。」呂方提到早前好多藝人醉酒駕駛，佢話：「我有嘟嘟（鄭裕玲）坐隔籬，好過吹波仔，佢成日會提醒我。」呂方透露噚日係佢同鄭裕玲拍拖十周年，佢話：「我送咗禮物畀佢，我哋冇諗過結婚，之前去咗泰國四日，當係honeymoon囉。」
陳芷菁噚日返亞視做節目錄影，咁啱見佢手上戴咗隻Cartier嘅限量版手表，原來係佢律師男友送畀佢嘅聖誕禮物，佢好開心咁話：「其實禮物只係心意，最開心係男友一向都唔係好細心嘅人，今次特別花心思去買呢隻表同埋一早放喺聖誕樹下面，令我好感動。」