聖誕過後，好友唔快樂，恒指又散116點，講跌幅，只係1.2%，但啲Call輪就淒涼好多，跌幅超過15%嘅，大約有50件。
滙豐（005）只係微跌1格，幅度只係0.29%，但啲滙豐末日Call輪，散得厲害，有5件跌幅由28%至56%，4件下個月夠鐘，1件1月10日夠鐘，扣埋假期，日子有限。最厲害嘅9404，1個月唔夠，跌幅9成，行使價87.50元，5日內滙豐（現價86.25元）升唔夠1.25元，隻輪冇得剩，萬一上升2.5元，則隻輪值12.5仙，升170%。賭末日輪，最好預咗輸清，而過往紀錄，末日輪臨到末日之時，若然仍有溢價或者屬於價外輪，輸清嘅情況亦屢見不鮮。
升幅超過10%嘅窩輪，共有19件，除咗1件係歐元兌美元嘅Call輪9312外，其餘清一色係藍籌或恒指Put輪，當中中移動Put輪佔咗5件，升幅由11%至19%。中移動（941）跌45仙，令到啲Put輪風騷。
國內電訊股轉弱之時，好興話會掀減價戰，股價再弱多一弱。想做淡買中移動Put輪，9440比較啱，現價31仙，溢價0.8%，槓桿率6.1倍，留意下月杪夠鐘，贏輸都要快手快腳計數。想波幅冇咁大，則揀遠期啲嘅9543，呢件溢價大啲，又係贏錢輸錢都要速戰速決。
章盛