街外天寒地凍，如果返到屋企可以馬上嚟個溫水按摩浸浴，相信一定可以令寒氣同疲累全消，如果可以順手做多個焗蒸氣，更是人生一大享受；其實以上咁多樣嘅沐浴享受，你都可以全部一次過搬番屋企，最近灣仔駱克道嘅「浴具街」，新返咗一隻混合式浴缸，一次過可以玩盡多重享受！
記者：朱崇德攝影：陳陶鈞
ImageGirl：LingLing
淋浴焗蒸氣水壓按摩
由意大利新返嘅AlbatrosForMeShowerBox，尺寸只係一個普通浴缸咁大，不過已經可以做齊淋浴、焗蒸氣同水壓按摩三大享受！
缸身採用堅固輕身嘅纖維板設計，缸身底部設有8個Filjets噴水口，可以做到水柱按摩功效，Model試用時覺得最正係佢有水力同噴水節奏調校，浸浴後好似俾人按摩完全身一樣！至於慳位概念在於缸尾嘅透明蒸氣室，基本只係佔用咗浴缸上面嘅空間，好適合香港狹小嘅居住環境。而且焗蒸氣室亦可當作淋浴室用，有時想慳水沖涼，都冇問題。
名家衞浴精品
電話：25980095
地址：灣仔駱克道188號兆安中心地下3-4號
女性專用尿兜登場
有人話，萬一當你飲大咗，去到廁所分唔清男廁定女廁，睇吓有冇尿兜就一清二楚，不過呢招以後可能唔Work啦！事關有舖頭最近由荷蘭引入咗隻女性專用尿兜LADYP.！
佢嘅擺位設計略低，聞說咁可以方便女性用家當無影櫈咁用，唔使同個尿盤有肌膚之親，真係諗得幾周到！聽代理講，佢哋現正打算將LADYP.引入香港政府部門同商業機構，所以大家有可能好快同佢見到面！
hansgrohe
電話：28028077
地址：灣仔駱克道185號地下
ColourLiving係全條街比較少見嘅大型浴室用品專門店，有三層兼數萬呎空間，講特色產品，佢哋最近新返咗一隻法國全天然香薰油燈，基本香味可分為紅色蘭花、綠色檸檬同藍色海洋。用法亦好簡單，只要將樽頂嘅燈芯點着3-5分鐘，佢就可以喺浴室內保持近45分鐘嘅香味，用嚟辟味最啱！
香薰顆粒蠟燭
而另一隻由香蠟做成小粒形狀的蠟燭，使用時只需將香蠟同燈芯放喺一個透明器皿內，咁就可以一邊燒、一邊睇蠟粒溶化，真係燒得又香又過癮！
ColourLiving
電話：22956881
地址：灣仔駱克道333號
熊熊公仔同乾花，除咗可以做裝飾外；套入意大利人的廁文化內，竟可搖身一變成為一塊好Fantsy嘅廁所板！
基本概念好簡單，挖空一塊透明廁板，然後將公仔、熊仔、花花、跑車、銀紙放入去，不過貴就貴在全HandMade，所以塊塊製成品都唔同，咁先夠特色！
瑰麗建築材料
電話：28342856
地址：灣仔駱克道188號兆安中心地下1-2號
駱克道必遊筍舖
駱克道街市3樓嘅英記奶茶，經營港式奶茶咖啡，由街邊大牌檔一直做到𠵱家上街市舖，足足有52年歷史！呢度啲奶茶好地道，佢哋堅持自己溝茶，再加有52年風味嘅沖茶「絲襪袋」同茶壺，想啲茶唔滑都難。唔好睇佢街市檔口仔，聽講呢度閒閒哋，每日賣成三至四百杯奶茶㗎！
英記奶茶
地址：灣仔駱克道224號3樓（25199063）
呢度專做潮式小菜客飯，午市時間駱克道街市門口，真係圍住好多人㗎！不過講到最香最正，都係啲「炸物」，例如炸蝦（$10）、炸狗棍魚（$10）、炸瀨尿蝦（$35）等，成隻炸到勁脆皮，味道又夠，送酒一流！
鴻記
地址：灣仔駱克道224號地下
又係教大家掃平貨嘅時候，駱克道Passion最近有批意大利聚脂熊仔座枱燈做特價，兩盞燈分別有18”同10”高，賣相好Cutie，大熊係一盞長明燈，小熊就係一盞觸摸式三段光暗調校座枱燈。
Passion
地址：灣仔駱克道300號地下（28770777）
呢度收藏咗好多四、五十年代嘅收音機、電話同鐘等古玩，而且好多都係操作正常；聽講呢度係由幾個志同道合之士主理，佢哋閒時會去東南亞入啲小飾物、案頭擺設同靚衫返嚟賣，好處當然係件數唔會太多，又夠特色啦！
次文化
地址：灣仔駱克道252號M/F（28773391）