港股聖誕假期後復市撞啱星期五，一來好多基金經理未放完假，二來短線投資者星期五通常唔做嘢，係例淡嘅日子，噚日港股成交重有28.77億元，都算難得。
市場又傳出中電信（728）變相實行單向收費，搶奪移動網絡市場。不過，由於新服務令移動網絡通話量減少，但中電信又未能同時從中獲益，基本上新服務係損人不利己，此舉觸發投資者拋售中移動（941）及聯通（762），但並無換馬追捧中電信，造成兩敗俱傷局面。中移動及聯通分別下挫2.3%及2.7%，而中電信亦挫1.4%。
藝立媒體（8192）在0.26元水平徘徊一段短日子後，噚日大幅反彈15.38%，重上0.30元收市，但成交僅18.19萬元。
黑客話，基本上隻股經過上次大跌，以及炒家出手接貨後，市場上貨源已經再度歸邊，後市可能會再向原定目標進發。至於原定目標係幾多？黑客笑笑口唔肯講，不過佢暗示此股大散之前曾升至0.47元，低位則會在0.26元水平。據聞炒家已經準備放完新年假後開車，但由於街貨已接近乾塘，追貨可能唔容易。
駿威投資（203）最近有董事減持，消息令股價受壓。阿虎嘅紅顏知己ｅ莉莎話，呢個並非好兆頭，通常都係管理層睇淡股價後市表現。佢又話，市場最近傳出駿威旗下合營廣州本田，明年將降價爭奪轎車市場份額，相信明年國內汽車市場競爭十分激烈。現時最慘就係汽車股近期已累積不少升幅，芬佬亦增持不少，一旦出現失控嘅減價戰，隨時會觸發基金洗倉，屆時沽壓一定唔細，散戶現時入市買汽車股要小心。
阿虎