年尾流流，好多股份都mark高股價，實行櫥窗粉飾，好似噚日邁特科技（1031）掛一手2000股2.4仙買盤，就將股價mark高140%，真係唔到你唔服。
經紀陳話，今年重有個半交易日就完，如果想趁大戶mark價坐一轉順風車就要快手，除咗一批國企股之外，二三線股睇好飛達控股（1100）。
經紀陳又話，飛達向來貨源歸邊，但歸邊之餘又有成交，唔係買咗沽唔出嗰種，兼且隻股有芬佬捧場，比較起一啲冇業績支持嘅股仔，確係唔同。
上周五隻股失驚無神被人質落2元邊，但即刻有人出嚟托住，本周反彈成交明顯增加。噚日股價升7%，收2.30元，成交金額有成1456萬元，唔係乾升咁簡單。
飛達往績PE8.8倍，息率亦有3厘，基於近一年工業股當旺，隻股現價唔算貴，就算有人年底櫥窗粉飾mark高股價，亦唔算太過份。
慕容小初