可能好多人會奇怪，點解桑田佳祐成四十六歲人，喺日本唔單止中年fans鍾意佢，連年輕人都好迷佢，無他嘅，佢係真材實料，另類同主流歌都難唔到佢，而且佢又唔會淨係一本正經唱歌，有時重搞鬼過啲諧星，失驚無神笑死你！
好似桑田佢喺舉行緊嘅全國巡迴演場會嘅場刊入面，啲相搞笑又抵死，唔係一般偶像夠膽玩㗎，我大口羅拉都寫個服字畀佢！
首先個封面搵個「肉女」同桑田佳祐肉搏，已經夠晒煞食，幅相影到桑田俾個「肉女」挾到好似唞唔到氣咁，但實情佢都不知幾enjoy！
內頁重精采，有個藝伎好搞笑咁咬桑田個髮髻，又有「女版曾志偉」飛身向佢投懷送抱，高中女生拗佢背脊，帶狗OL向佢落井下石踩多一腳，桑田吓吓都狀甚痛苦，搞笑效果爆晒燈！
其實唔止桑田，連跟佢搵食嗰班演唱會樂手，喺場刊入面都要被蹂躪一番。而後尾幾頁又有桑田嘅換衫公仔玩，佢赤裸裸咁淨係用塊黑布遮住重要部位，各位可以試盡佢多年嚟嘅突出造型。