衞生福利及食物局常秘尤曾家麗九八年升為甲級政務官，最近升職，正式做D8。咁高興當然要同佢食番餐飯慶祝，於是約埋佢同埋佢兩位左右手陳育德同楊何蓓茵一齊傾吓偈。
話題當然離唔開雞。最近禽流感又再殺到，彭福同九龍公園啲天鵝都遭殃，時值歲晚，大家都好擔心過年冇雞食。政府嚴陣以待，頻頻去洗雞籠，事關冬至前後，港人食雞食多咗成倍，平日十二、三萬隻，過節竟然增至二十五萬隻。
雞多籠迫，自然易出事啦，但雞販嫌政府阻住佢哋發財，就算你免費幫佢洗都唔肯。所以尤太都擰晒頭，好煩惱，佢話一唔乾淨，病毒就易散播，到時就大件事喇！
尤太重話，大家對冰鮮雞亦有誤會。即如冰鮮雞個紅印，有人批評太隱蔽。其實買冰鮮雞唔使睇有冇紅印，個印係為活雞而設；如果大家買已屠宰嘅活雞，就真係要睇清楚有冇印喇，如果有，就知係「冒牌貨」。
傳真︰2623-9278
電郵︰