新銀集團（988）聖誕假前半日市，成交暴增至2356萬元，真係好耐都未見過咁熱鬧嘅場面，隻股收報1.5仙，跌6.25%。
據聞早前新銀為重組債務，發行逾20億股新股抵償2400萬元債務，而有關債權人已開始出貨套現，但此股成交一向稀疏，直接沽出市場好難搵人接，有人為呢批貨搵到炒家，股價由1.1仙炒上2.3仙，升幅逾100%，其後債權人就開始在高位出貨，令到股價由2.3仙高位回落至1.5仙附近，市場傳聞成手貨已轉畀大炒家。
黑客估計炒家呢手貨成本大約係每股1.5仙，相信至少要炒上3仙以上，至可以全身而退。若想賺錢嘅話，可能重要冒險推高啲，現時散戶對三四線股信心唔大，炒高都唔知有冇人跟。
新高準（690）將於下周一公布中期業績。Cookie話，由於中國市場表現唔錯，業績估計繼續錄得增長。上次公布全年業績時，公司每股賺0.189元，但就派息0.10元，派息比率高達53%。新高準假前報0.92元，往績PE4.9倍，股息率5.43%，相對於銀行存款而言，新高準算係不俗嘅投資。不過，新高準中期未必會派息，有傳聞公司可能有嘢派，希望可以刺激股價表現，但傳聞有幾堅就真係好難講。
講開現時銀行低息問題，ｉ師傅話，現時銀行存款接近零息，存錢入銀行嘅回報，根本唔可能抵銷銀行可能會倒閉嘅風險，理論上，存款入銀行根本唔值博，存戶唔將存款提走放入枕頭底，可能只係反映存戶覺得放錢在銀行，比較放在屋企安全而已。
阿虎