2002年話咁快又過去，對於Game界嚟講都有唔少事發生，有合併有倒閉，香港又有XBOX正式登陸，到底現時主機三大勢力：PS2、GAMECUBE、XBOX會否重新執位？今日就分別搵嚟Game書編輯、Game舖代表同標準Game迷，同大家講吓過去一年，三部主機喺佢哋心目中有咩地位同變化。
記者、攝影：徐影龍
全世界嘅機迷同軟件商都知道，PS2係最多大作推出嘅機種，每個月都有幾款勁Game推出，機迷唔憂冇Game玩，睇吓每年例Hit嘅《Gundam》同《WinningEleven》系列就知，加上羊群因素下只有更多人選擇PS2，所以穩佔全球八成市場成一哥。任天堂嘅GC畀人一種好強烈嘅自家貨靚味道，話題作始終係自家出品，唯一異數係《BioHazard0》，不過除開一年十二個月，平均一個月都唔夠一隻大作，較難吸引心多嘅機迷入市，歐美市場則更為慘淡，因為佢哋諗嘢好長遠，絕對唔會為一隻《BioHazard0》而買機。
至於XBOX嘅弱項同樣係欠缺知名大作，日本一啲大廠如世嘉推出《莎木2》，喺美國都只係賣到二萬幾隻，要賣錢惟有傾向推出啱鬼佬口味嘅Game，例如《飛龍騎士ORTA》就好成功。好多亞洲人亦會嫌XBOX機身太大難以安放，所以亞洲區銷量始終久攻不下，幸好以強勁機能及配合本土口味，喺歐美重有不俗嘅銷量，同情況啱啱相反嘅任天堂相映成趣。個人認為PS2獨大局面到下年都唔會有變，XBOX同GC只有喺剩番嘅兩成市場度爭，不過兩者針對機迷層面明顯唔同，所以變化其實唔會太大，當然我極希望見到市場百花齊放局面，唔好得一部機威晒。
講銷量不論主機定Game，始終都係PS2第一，就好似早排推出嘅《WinningEleven6FE》咁，十個入嚟佔咗九個都係買呢隻Game，更瘋狂嘅係機迷嚟到，多數唔會問價甚至周圍格價，好爽快咁畀完錢就攞Game走，令到同期銷量不俗嘅GC皇牌《薩爾達傳說：風之指揮棒》都大幅比下去，不得不佩服PS2加大作嘅龐大市場消化能力。
至於XBOX，由早期水貨到𠵱家行貨推出，都欠缺一啲真正嘅大作，不過呢個情形隨住《飛龍騎士ORTA》推出而有所改變，加上下個月推出嘅《DOA沙灘排球》，令到好多機迷都預早買定部XBOX，可以講GC同XBOX在港形勢均等，不過睇番發售表，嚟緊XBOX重有好多大作推出，加上行貨銀彈式宣傳攻勢，好易過GC頭成為阿二。
由當年世嘉MegaDrive同任天堂FC?SFC之爭，到SS?DC同PS?PS2之爭，我一直都有捧世嘉場，講創意講遊戲性講誠意，世嘉始終係No.1，相信Game界中最多Fans都係世嘉。轉到以軟件商身份跨平台發展後，喺PS2上除咗隻《VF4》外，暫未見有咩大作支持，相反XBOX就有隻係人都讚嘅《飛龍騎士ORTA》，可算已盡軟件商嘅責任，成敗惟有靠主機銷量。
至於PS2及GC我都有買，要數全年最喜愛嘅Game，首選PS2《TOD2》，由畫面、故事到系統都製作得極之用心，好有傳統RPGFeel，中文版推出後我會再玩多一次。至於GC遊戲就嫌太過細路仔，不過我都有捧《BioHazard0》同《薩爾達傳說：風之指揮棒》場，不過講到創意同新鮮感我就好鍾意《風之指揮棒》，可惜世嘉冇乜大作喺GC上推出，數嚟數去得隻《PSOI&II》吸引啲。
猶記得當年世嘉嘅Satrun同SONY嘅PalyStation第一年正式埋身惡鬥，SQUARE嘅《FFVII》重未喺PS上推出，世嘉仍可一爭長短，雙方可謂勢均力敵，鬥個難分難解，尤其係臨近年尾聖誕時候，雙方不斷推出超大作，令到Game壇熱鬧非常，當時好多機迷都同時擁有兩部主機。正如電玩太郎話齋，Game壇始終百花齊放好啲，千祈唔好側埋一邊。
另一個市場唔健康嘅情況，就係好多廠商嘅方針，以有賣錢保證嘅續篇為主導，機迷根本冇可能同一時間消化咁多所謂大作，搞到好多細Game或新Game缺乏市場支持，新意欠奉下漸漸形成惡性循環。希望嚟緊家用機市場能回復昔日嘅繁榮，多啲有創意嘅Game推出，等機迷有多啲選擇。