皇崗口岸年廿五終於可以全日通關，呢件事，煲呔曾出咗唔少力，但更要多得中國財政部長項懷誠。
項懷誠早排親自落嚟廣東，逐個關口巡視，八方都好𢱑頭，呢件事同財政部長有乜嘢關係？後來有北京朋友話，香港特首開到口想通關，但有地方官阻頭阻勢，話設施未配合；結果驚動中央，馬上由國務院港澳辦公室主任廖暉陪同財長南下。
由項懷誠處理呢件事都算適合，因為部長級官員中，佢較為熟悉香港情況，連中大校長金耀基都大讚佢內行。
話說項部長上個月訪港時，專登到中大演講，重接受學生提問，中大呢鋪威過港大，金校長已經好自豪，加上項部長一句「中大這樣才像大學」，金校長更加高興，以後見到人就讚項懷誠又醒又內行。
不過今次特區又要靠中央撐，又得失鄰居，長此下去都唔係辦法。
傳真︰2623-9278
電郵︰