平安夜，恒指微跌9點，藍籌普遍冇乜變化，但有啲相關Call輪則跌得幾勁吓，且創新低。以前講過，每逢臨到月尾，就快轉月份之時，啲Call輪「收水」（溢價收縮），除非正股突出，否則Call輪跌得好快。
長實（001）周二跌50仙，長實Call輪9517散18%，過多兩個半交易日，隻輪變咗「下月」到期（2月杪到期），現價19.6仙，溢價8.1%，槓桿率26.4倍。咁嘅溢價，喺時日無多之下，仍屬風險好高。
3月初之前夠鐘嘅Call輪，溢價如果有10個8個巴仙以上，最好避一避，除非認為相關正股會喺三朝兩日之內急升2-3%以上。個市如果冇力上，正股如果跌多一跌，呢啲輪跌勢會更加凌厲。
電盈（008）周一升6仙，周二跌3仙，周二啲大動作電盈Call輪冇點跌到。例如9417收43仙，只係低咗0.1仙；9639收9.3仙，反升0.1仙；9641收11.8仙，跌1仙，稍為跌得似樣少少。呢類大槓桿率嘅電盈Call輪，對正股變化理應反應非常敏感，但半日市交投靜易做手腳。
短期內除非正股再升得似模似樣，否則啲輪價唔易企得住，炒電盈輪應有心理準備贏輸快過喺澳門賭大細。
章盛