日本女星𠵱家投資喺自己身上嘅金錢認真唔少，除咗養住班御用化妝師同髮型師要使一大筆外，近年因為花甲成為出騷必備品，結果又要使多筆，條數真係襟計。
不過前年攞過「最靚花甲藝人」嘅米倉涼子真係有計，立即諗到條財路，佢將自己過往戴過出騷嘅指甲一次過騷晒出嚟，重教你點襯埋衫㖭！
雖然花甲呢樣嘢係天后濱崎步玩先嘅，但米倉一句唔該就搶先出書。喺米倉本《米倉涼子2003FashionBook》入面，騷咗佢主持音樂電視節目《The夜Happie》時戴過嘅三十七套花甲。米倉話裏面包羅萬有，包括花甲初學者適用嘅單色普通油甲、鴛鴦色甲，慢慢就可以花巧啲，貼吓碎星同畫間條。若果想好似花甲美容師咁專業，不妨整啲吊墜、花邊喱士、羽毛、甚至掛條鏈落兩隻指甲之間喎！
不過呢啲香港都未係太興嘅玩意，價錢當然有番咁上下，如果各位姊妹去開日本幫襯米倉去開嗰間喺涉谷嘅Piece，四十五分鐘最少都要過四百大元港銀，好過去搶。我大口羅拉呢排都有啲手緊，真係要向米倉偷師賺吓錢先！