八方同事早排寫咗篇報道，話公務員事務局喺月初向部門首長發出便箋，指示部門要凍結公務員升遷，點知公務員事務局第二日高調出聲明，話冇咁嘅事，重話便箋內提出嘅考慮升職原則「無新意」；但八方收到一位聲稱係新聞處員工嘅電郵，篤爆公務員事務局講大話。
呢位仁兄爆料話，新聞處原本確定喺月中進行升級遴選，但當公務員事務局發出便箋後，部門主管即刻叫停。佢批評政府對符合晉升條件嘅新聞主任唔公平，而公務員事務局指「看不到有何原因令具備能力的公務人員的晉升前途受到影響」，更加係一派胡言。
新聞處發言人承認，原本今個月進行嘅升級遴選工作會延期，部門首長喺諮詢民政事務局常任秘書長同公務員事務局意見後，若確定有關空缺喺中期運作上需要保留，至可以作實升職。情形同八方同事寫嘅嘢一模一樣。
其實，八方將事件講出嚟，最想話畀公務員事務局長王永平聽，好多公務員對嗰封你哋形容為「無新意」嘅信箋，非常唔滿意。
傳真︰2623-9278
電郵︰