每年聖誕同新年呢啲假期，好多二、三線歌星同藝人都會趁機幫啲商場做show搵番啲外快，不過今年經濟唔好，啲商場都唔係咁捨得使錢，重要撞正麥浚龍（Juno）以六百蚊包埋舞蹈員嘅超平價幫商場做show，搞到其他藝人同歌手都冇啖好食。
以前啲二、三線歌手接商場show，一般都可以搵到千幾二千蚊外快，但今年有Juno頂爛市做show，其他歌手當然更難搵食。聽一啲歌手講，話今年啲商場show畀唔起錢不特止，而且想做亦未必有得做。馮仁昭叫啲歌手唔好恨咁多，因為佢哋冇個有錢老竇，做嘢唔使乜都睇錢份上。
吳文忻同樊亦敏噚日去到元朗廣場，為一個慈善show做嘉賓。佢兩個着住聖誕女郎裝到場，吸引過百名市民圍觀。吳文忻同樊亦敏喺台上同市民大玩遊戲，又教觀眾跳聖誕舞，跳到好興奮之時，兩個重好有默契咁屁股撞屁股，搞到現場觀眾笑唔停。
李克勤同譚詠麟噚日喺尖沙嘴，出席二月初喺紅館嘅演唱會記者會，阿倫喺台上度話：「𠵱家起雙飛實掂。」克勤即刻話：「阿倫梗係咁講，因為佢鍾意Twins，不過我同阿倫一齊開演唱會，歌迷一定要嚟睇睇。」克勤重話阿倫𠵱家好鍾意細路仔，連拍MV都會搵啲細路嚟拍，對細路仔愈嚟愈有愛心。
新城DJ葉文輝（啤梨）噚日同Cookies喺九龍公園出席新城活動，但嗰度唔停得車，所以佢哋要喺金巴利道落車，然後行路到柏麗大道。啤梨同Cookies嘅fans夾埋有四十幾人，沿途一直追住佢哋，場面都幾混亂。後來啤梨同Cookies向fans派禮物，啤梨嘅全女班fans竟然同Cookies嘅全男班fans大聲鬥嗌，好似男女鬥唱山歌咁。
郭富城噚日去馬鞍山「伸手助人協會」專為長者而設嘅度假中心，城城除即場派聖誕禮物畀公公婆婆外，重由佢設立嘅「郭富城國際慈善基金」捐咗一部十八座復康巴士畀度假中心。問城城聖誕節有冇收到藤原紀香嘅e-mail？佢話：「私人嘢唔講，不過呢幾日可能太多e-mail，搞到部電腦壞咗。」