今年對九鐵行政總裁楊啟彥嚟講唔係好年，佢頭上無端端多咗個田二少田北辰做九鐵主席，自己做主席嘅職訓局又是非多多，成日俾陳婉嫻、鄭耀棠同李鳳英哋批評，最後搞到總幹事李鍔要黯然引退。
八方以為楊官一定意興闌珊，唔想再理職訓局，點知佢早前鬼咁高調同啲行家講佢嘅八年大計，原來老董同教統局局長李國章已經𠱁點咗呢位第六屆主席，再管多一年職訓局。
楊啟彥今次獲延任，中間原來都有啲波折，話說人氣急升嘅田二少日日想為特區政府服務，佢做過職訓局，又係僱員再培訓局主席，所以都好想接埋楊官職訓局主席嘅位嚟做，以繼承佢老爹田元灝未完成嘅工作。於是有人就直接去阿董處傾。
點知呢種直上天庭嘅做法令主管教育嘅李國章覺得唔多妥，加上呢個位一般做滿六年先卸任，所以最後都係叫楊官捱義氣，做埋下一年先退。
唔講唔知，原來田元灝係職訓局嘅第一任主席；而呢個主席位都幾邪，單數屆即一、三、五屆嘅主席，包括張鑑泉同黃秉槐都係任內因心臟病逝世，所以將來接任第七屆者一定要身體好fit同好夠煞氣。
傳真︰2623-9278
電郵︰