當所有食肆大閂水喉之際，素食一家仍然強調用料不計成本，祖國平價貨無保證不敢用，全是日台及美澳飛機貨，連客人坐下喝的一壺茶，也挑剔至非日本玄米茶葉不用，還推出心動價$298足十人份量午市套餐，如此「揮霍」，卻有本事在兩年內連開三間店，可算是逆市神話。就等狂歡過後，一齊嚟清清腸胃之際，順道領略一下這個逆市致富的神話。
記者：邵超 攝影：陳陶鈞
◇一場金融風暴，把張先生從高處拉下，40多歲才失業。
◇徬徨地從台灣回港，幸好在台期間，洞悉齋菜創作空間和規模可以無限大。
◇結合一班志同道合的人，終於在新派素食館裏打響名堂。
◇近兩年逆市間已開了三間齋菜舖。
翻查去年某報有關素食一家尖東總店的報道，張先生曾揚言開店目的不為錢，即使做得好也不會開分店，想不到一年不到便在同區金馬倫道再開分店，兩個月後沙田第三分店也誕生了，豈不是自打嘴巴？神話的其中一位主角張先生面帶笑容道：
「每樣材料嘅成本都大咗，但用心做自然有人欣賞，開業到𠵱家未有一個員工流失過，熟客亦自然返嚟幫襯。」
張先生又無奈地說：「我哋係畀熟客迫嘅。」張先生不是大言不慚，原來很多熟客遠在屯門、元朗一帶，經常長途跋涉跑到尖沙嘴不甚便利，群起要求在新界區開店。談起三間店舖的選址，原來正是素食一家經營策略之一。
「只要稍為方便嘅舖位，唔一定要街舖，因為街舖租貴，嗰筆錢用喺啲客嘅身上重好。」
雖然位置不是人流興旺的地方，不過素食一家三店的慣例是開業一個月後，便會引來人潮排隊，有口碑自然有客到。
除吃到價錢與質素成反比的優質素菜外，一眾股東對品質十分堅持，新菜背後更有動人故事。店裏賣的印度餅，由退休的張爸爸主理，山東人做的麵食不會差到哪裏去，每天做完立刻送往三間店裏，好讓客人有好餅送咖喱。
「我經朋友介紹，喺九龍城搵到個賣茶葉果嘅婆婆整台式米麻糬，每星期畀佢$800搓一千粒，供應三間店，自己車貨，對婆婆嚟講已經係一筆大數目，而且覺得自己係有賺錢能力嘅有用人，我覺得佢整啲米麻糬係最好嘅，值得畀呢個價。」
素食一家推廣無包袱的素食文化十分成功，包括價錢（平）、環境（無佛像，似Cafe）、口味（少油），最特別是特意聘請年輕的廚師，貪其容易變通，寧願花點時間培訓。「喺素食一家可以拋開以前覺得食齋好貴嘅觀念，亦唔會食嚟食去都係嗰幾個花款。以前因為工作關係去過差唔多二十六個國家，喺台灣做咗四、五年生意，食過好多地方嘅菜式，所以呢度啲菜都有我累積嘅人生經驗。」
這句話出自靠食素由二百多磅激減至百多磅、年前還在中年失業困局中打轉的張先生口中，特別有說服力。
「我食齋都有五年，有一次無意中撞入尖東素食一家，覺得菜式好特別，之後都成日嚟幫襯。唔記得當初由邊個提出合股，大家推廣素食文化嘅理念相同，金馬倫道店時開始合作。」
「我食齋都有五年，有一次無意中撞入尖東素食一家，覺得菜式好特別，之後都成日嚟幫襯。唔記得當初由邊個提出合股，大家推廣素食文化嘅理念相同，金馬倫道店時開始合作。」
任職保險界的陳先生是老主顧，由尖東吃至金馬倫道、沙田。
「逢有新場開，成班食齋朋友都會約埋去試吓。覺得呢度有特色過其他齋舖，最鍾意約客人喺呢度食飯，最犀利一星期食足七次。捧場多啲，等佢開多幾間分店畀我約客食飯嘛！」
Joanne自小學起就食齋，一家人愛到尖東素食一家吃飯，今次是第一次光顧沙田店。
「覺得呢度味道唔錯，通常跟屋企人嚟食，有時都會帶埋朋友嚟食。」
地址：沙田廣場地下44號
電話：26972230