股市近排似乎愈來愈多稀奇古怪嘅古仔，好似大凌集團（211）就屢次傳聞有大陸客想敵意收購，雖然小初點都唔信有人咁藝高人膽大，去搞大凌個場，但今次市場傳到似層層，話班大陸客走去證監會投訴，搞到大凌被證監會停牌咁大件事。
雖然傳言講到似層層，但小初仍然好難相信有咁嘅事發生。經紀陳話，姑勿論單料係堅定流，在發生今次停牌事件後，大凌搞緊嘅供股計劃，睇嚟都係泡湯居多。如果真係咁，今次將係大凌唔夠半年內，第二次供股計劃流產，成為股壇上一個紀錄。
大凌喺11月，公布併股8合1，然後每1股供2股新股，供股價0.10元，集資4080萬元。股份原本計劃在周一除淨，但隻股剛好在周一被證監停牌。
小初記得上次大凌供唔成股之後，好多股東都嬲到哇哇叫，佢哋原本諗住除淨前沽咗，供股後可以低價收番，點知最後如意算盤打唔響。如果今次歷史重演，班炒家可能會嘈到拆天。
慕容小初