2002年就快過去，大家最需要係乜呢？其中一樣梗係一個新月曆啦！蘭西都收到好幾個03年月曆，當中以恒基送嚟嘅比較特別。封面係香港夜景，印晒集團所有嘅上市公司logo，一目了然。
第二頁係集團聯營公司同附屬商號提供嘅優惠券，包括美麗華旅運、油麻地旅遊、千色百貨、哈迪斯、美麗華酒店、香港麗東酒店、towngasavenue同仁安醫院等。宣傳兼拉生意，一舉兩得，認真精明。印象中好似係第一次收到咁嘅月曆。
蘭西記得，早幾年科網熱，恒基曾經送過月曆同月曆光碟，當時夠晒突破，呢一兩年經濟唔好，就送好實際嘅購物優惠券，真係好緊貼潮流脈搏。
馬灣珀麗灣啱啱開始收樓，業主係時候要諗吓點裝修嘞。若果有專業人士提供意見，係咪好啲呢？
家居設計月刊《今日家居》就炮製個《珀麗灣室內設計特輯》畀屋苑業主參考，除咗有唔同嘅設計意念外，重有實用資訊、交通指南、學校網同馬灣未來發展等實用資料。只要係珀麗灣業主，登入今日家居網站
原來，《今日家居》之前都有推出過《禮頓山室內設計特輯》，睇嚟佢哋都好識趁勢搞宣傳。對業主嚟講，都可以有個方便途徑去搵啲有用資訊。
今年幾次重點推盤，都配合晒天時地利嘅九龍倉，旗下負責賣樓嘅夏利文，有兩位重臣升職加薪，包括梁秉權同何詠儀，何小姐度假中，梁SIR則仍然堅守擎天半島售樓處。
噚日黃光耀向在場嘅記者同經紀宣布梁SIR升職喜訊，即場開香檳慶祝。黃光耀話，原來梁SIR已經做咗27年，係公司最老資格嘅重臣。今年公司賣樓成績理想，而梁SIR同何小姐表現好，自然論功行賞，升職加薪過肥年。黃光耀今年至升咗職，𠵱家輪到同事，集團真係喜事重重。
問梁SIR有乜嘢難忘經歷？原來係大埔倚龍山莊，當年墟冚嘅排隊場面仍然歷歷在目；至於最易搞嘅係又一村又一居，梁SIR話，當年啲客為求買到樓，幾乎唔睇價錢就簽約，所以好易賣。
聖誕節假期新盤銷路無驚喜，反而電影業就非常好景，大部份戲院都出現排隊購票人龍，好似排隊睇示範單位一樣。
噚日中原地產包咗太古城中心間迷你戲院，各區阿頭齊齊睇戲慶祝聖誕，睇嘅係「無間道」，套戲好唔好睇唔緊要，最重要係大家平時賣樓咁辛苦，難得假期可以鬆一鬆。其實套戲個名都幾啱做地產嘅人睇，賣樓「無間」，維生之「道」也！
每逢年尾，蘭西都會遇到頭痛嘅事，就係好多地產商同代理一齊搞飯局，唔知去得邊度，真係「順得哥情失嫂意」。
蘭西日前收到香港興業嘅聖誕卡，當中附咗張請柬，話今日有個飯局，不過內容都幾與別不同。開頭話今年係艱苦一年，但「一元復始，萬象更新」，𠵱家正期待美好嘅03年來臨（蘭西都希望係咁），重話更值得慶幸係識到「你」呢個朋友，所以趁佳節聚吓，順便講講未來嘅期望。睇完封請柬，蘭西都有啲感動，呢個飯局都好難推嘞！
蘭西
電郵地址：