同經紀李繼續攞料，佢話「新港」除咗「無印」呢個大租客外，幕後重有個隱形大富豪，一口氣租咗唔少「新港」舖位，屬場中第二大豪客，佢哋就係「中央處理器」集團。
自從「掃把老化」埋咗第二個老闆堆，捨棄「新港」遠走漆咸道南後，「中央處理器」集團非常拼搏，啃埋「掃把老化」遺下嘅吉舖，連埋樓上「一粒星」同「德國健步鞋」，實行勇戰尖沙嘴，成為區內第二大潮流人氣社團。
經紀李話：「其實『中央處理器』集團崛起於旺角，勢力範圍包括波鞋街一帶，『運動世家』就係佢哋公司另一分支，近年積極趁淡巿擴展勢力，連銅鑼灣恩平道都插咗支旗，後來搞埋『一粒星』同『德國健步鞋』代理，所以你見佢哋旗下舖頭都力谷呢兩個品牌。」
經紀李補充：「『運動世家』有樣嘢好，永冇炒鞋，唔會趁火打劫，例如早排熱辣辣嘅關刀波鞋，佢哋都照原價賣出門口，唔似『車輪多』扣起啲鞋運去日本賣。好多波鞋細路都鍾意落去買嘢。」
「唯一敗筆，就係旗下『一粒星』早前同廣告雜誌聯手搞踢爆假鞋，點知出嚟有反效果，啲客睇完以為本周刊推介邊度有平價『一粒星』鞋賣，假貨佬當然陰陰笑。良禽擇木而棲，以後要帶眼識人至得。」
主持人：大食Jack
八卦熱報：