馬主H去港大聽GaryBecker演講，聽到科大研究生與貝加教授講讀書嘅標籤效應，即係話，你自某校某系畢業，學唔學到嘢暫時冇人知，但一張沙紙就顯示咗你係畢業生，等於識嘢，容易說服僱主請你。
貝加教授認為此說不通，因為真材實料者一定會出頭，否則市場就會失靈，馬主H亦認為係，但喺現實社會，尤其是在短時間內，標籤效應未必唔啱。馬主H記得同劍橋大學博士Y傾過讀名校嘅問題，博士Y話：「好彩我喺劍橋畢業，人人畀幾分薄面，重有得撈。」
博士Y現在返璞歸真，對名利不再重視，但佢當年喺大行做高層嗰陣，每年收成一千封求職信，邊度有時間睇，於是只係睇（一）牛津劍橋倫敦三間英國大學，（二）美國長春藤大學、西岸及中部十間八間名校嘅畢業生，其他啲來信，對唔住，恕不一一盡閱。呢啲學校嘅學生係唔係一定叻晒呢？當然唔係，但社會短期內會吸收名校名系學生，以為佢哋好掂，到咗入職之後，知道佢哋唔掂，就會淘汰之，一樣冇情講。不過咯喎，名校沙紙確有標籤效應，容易成為敲門磚，起碼幫你入咗大公司先，遲啲冇料俾人炒，到時先算。
所以博士Y認為：「讀一兩年嘅短期商科工科碩士課程，純粹係商業投資，梗係非名校不讀啦，以免投資大，回報少呀！」聽起嚟，過份現實，但唔聽嘅話，日後更惆悵。