阿仙奴門神今季都可算係認真黑仔囉，施文、沙賓同泰萊輪流受傷，而佢哋個二號門將沙賓又喺平安夜練習時斷腳，重要今季復出無望，搞到「兵工廠」鬧門將荒！
沙賓目前個傷勢都好嚴重，右腳脛骨同腓骨都斷咗，情況好似些路迪射手拿臣當年斷腳差唔多，預計要唞成幾個月，即係今季無乜機會再踢嘞。話時話，「兵工廠」門將開季以來都幾多唔吉利事件發生，好似施文咁，季初頻頻出現被「笠死」事件，搞到議論紛紛之際，又肩傷復發要休息；沙賓喺作客曼聯場關鍵聯賽拉傷，點知入替佢嘅泰萊早前又手指骨斷裂，結果𠵱家輪到得施文一個撐住，都算係多事之秋囉！
不過，我求大俠認為阿仙奴都唔算黑到極點，話晒球員轉會市場重有幾日就重開，最多只係頂住兩個禮拜，如果呢次意外早一個月發生，怕且雲格好似雲拿保斯咁發惡炮轟新轉會市場制度。
謝拉特係上場對愛華頓打吡戰雙腳踩尼史密夫事件重等緊足總裁決，但係利物浦領隊侯利亞就已經出嚟力撐，講到呢次攔截的確係肉酸之餘，亦幫謝拉特求情，話如果佢有心傷人，尼史密夫應該會斷腳收場；但我求大俠就唔多同意嘞，若果真係要斷腳先至叫蓄意傷人，咁搞法成班英超球員唔使兩季都可以隨時收山轉行。
中國足協早前就已經公布咗新教練官方名為阿里漢之後，居然引起一場「阿里漢對哈恩」嘅名字之戰，因為多份國內著名體育媒體一早就已經用哈恩這個譯音，重聲稱已經查過新華社《世界人名大全》，書上寫明荷蘭譯法係哈恩，絕對唔讓步。估唔到呢位中國新教頭未正式執教經已引發國內大戰，認真「惹火」！
我求俠收到風，「巨無霸」奧尼爾今日將會喺洛杉磯某個地方，同佢兩個仔女嘅母親舒雲妮秘密結婚，聽講佢老婆宜家又大咗肚，喺五月會為巨無霸生第三個。其實計我求大俠話，湖人今季愈打愈沉頭頭碰着黑，早就應該搞啲喜事沖喜吓，真喺好希望快將再為人父嘅奧尼爾早日洗晒啲衰氣，振作起嚟，帶領湖人走出谷底。
各位響聖誕節收到乜嘢禮物呀？西班牙南部一支地方球隊華里斯魯比奧，響呢個聖誕就收到一份大禮，佢哋班球員扑中咗個彩票彩池，總共得到獎金一億六千萬歐羅（約十二億八千萬港元），呢個數目已經係國內班霸巴塞隆拿每年班費嘅六倍！開彩嗰陣，佢哋重比緊賽，中獎消息傳出後，班球員響半場就開晒香檳慶祝，結果場波輸咗兩粒，不過突然變成大富翁，輸廿球都冇計啦！