杜德偉前日凌晨因涉嫌藏毒，在跑馬地被警方拘捕，後准以五百元保釋。杜德偉對事件不欲多談。而前晚在深圳歡樂谷演出的他，本預計昨早返港，但臨時改變行程，留在內地，免受傳媒追訪。
杜德偉（Alex）前日凌晨在跑馬地黃泥涌道一夜店通宵聖誕狂歡時遇警方突擊檢查，他被懷疑藏有大麻，當場被捕，後以五百元保釋，並須於下月二十九日返警署報到。前晚杜德偉於深圳歡樂谷演出，據悉，杜德偉本打算演出後在昨日早上返港，但卻臨時留在內地，似乎是為避鋒頭，免得回港後被傳媒追訪。
而杜德偉女友周汶錡同樣採取迴避態度，昨日傍晚六時左右，她返回與杜德偉位於渣甸山年達園的寓所，見大班傳媒守候，即加速衝入大廈。
昨日下午三時，杜德偉透過電話作回應，他說：「我重喺內地，我問過律師意見，我𠵱家唔可以對外作任何回應，多謝大家關心。」而杜德偉所屬滾石唱片總經理鄺敏慧則說：「Alex啱啱同滾石續咗兩年約，預計明年出新碟。我哋重未聯絡到佢，所以唔方便講任何嘢，我哋會盡快聯絡咗佢之後，了解咗件事先。」
杜德偉母親張露昨日凌晨接受電話訪問，表示不排除兒子是遭人陷害，希望盡快把事件弄清楚，張露說：「我個仔冇打畀我，係有個朋友話我知，我覺得好好笑呀。我對個仔百分之百信任，佢可能俾人陷害，唔信你靜雞雞跟蹤佢三日三夜，睇佢有冇食嗰啲嘢囉。佢咁多正經事做，唔會做咁無聊嘢㗎。」
周汶錡妹妹周麗淇昨日在石澳出席《百分百感覺》祝捷會，她表示並不知情，她又謂前晚與胞姊晚膳時，不覺對方有異樣。周麗淇驚訝地說：「唔係嘛，係咪頭版呀？佢平時連煙都唔食，好健康，係鍾意跳舞同做運動，可能係誤會呢。」
譚詠麟昨日在尖沙嘴出席記者會時說：「我知喺外國有小量自己食嘅係唔犯法，香港法例點講就唔清楚。乜𠵱家重有人食呢啲（大麻）㗎？唔係食K仔㗎咩？」與杜德偉參與同屆新秀比賽的李克勤則說：「所有嘢都未審，我唔想評論呀。」
採訪：戴彩煥、陳梅香
攝影：陳梅香、林德雄