一個人悶到發霉，你會做甚麼來打發時間？我會玩「形容臉孔」遊戲，即是諗一個人樣，盡量地形容出來。好玩談不上，也好危險，隨時諗到頭爆，但好過發霉，且，玩得多，形容詞會拿揑得愈準確愈生鬼，對寫作好有幫助。現在，就姑且用我心上人來玩一下吧：
長方形的臉，但打橫，下半張臉闊過上半張臉少少，但又不是梯形。兩條眉離得幾開，左眉就是用一支唔順暢的筆寫個「一」字，要左右來回寫幾次的那個效果；而右眉，就是摺埋張紙印過去，跟左眉咁一模一樣。打橫個「O」字母的眼睛；小雙眼皮，有時內雙；眼眶以內的東西黑白唔分明，似打蛋唔靚，蛋黃散散地。無眼袋或眼套，有黑眼圈。無鼻樑，鼻頭有點肉，但打橫、裹住鼻孔發展，而鼻孔長期露出鼻毛。以打橫長方形的臉來計，人中算長。上唇太厚，下唇比下去的瘦，長期甩皮。笑時露牙肉，肉削，肉色似無保鮮紙包住的隔夜牛扒……
一定有更好玩的事情，只不過當初太思念一個人，才衍生這樣的遊戲。
（編按：康妮續稿未到，暫停一天。）
容雅慧