基本法第二十三條立法諮詢期，前日已經到期，保安局收到嘅意見書有二萬幾份，相信保安局要整理，需要唔少時間，至於如何篩選取捨，葉劉淑儀自有主張，凡簽署《蘋果日報》標準表格反對立法嘅，會得到幾多尊重呢？希望唔好當係廢紙啦。
三個月嘅諮詢期，顯露咗社會對立法嘅意見有相當分歧，兒孫亦有不同意見。初中生細路C上星期六跟外公去食蛇，本來冇乜特別，但原來今餐係在一個民航工會嘅新蒲崗工會會所舉行，一千八百蚊一圍，細路C外公係幾十年熱心工會分子，買咗一圍請家人去食，細路C自然跟埋去。據細路C講，開飯之前，要聽「領袖」講一大堆支持立法嘅演講，台上有台上講，台下有台下閒話家常，講波講馬，「領袖」們就聲嘶力竭，鼓勵佢哋去參加星期日維園大遊行。
問細路C：「食完蛇宴，聽完演講，支唔支持立法呀？」細路C答得妙：「我喜歡自由民主，不過睇得到，阿公輩份嘅工人，好多支持。」
香港行一國兩制，基本法二十三條就搞到唔少家庭一家兩制。譬如報紙話浙江第一銀行孔祥勉支持立法，但佢位親家林行止就喺專欄度猛烈批評立法，呢類情況，喺好多家庭相當普遍，大抵係老人比較支持，年輕人傾向反對，教育程度高者，反對比例更大。點解有四十七巴仙人士反對（據中大調查），點解多讀書人反對？葉劉淑儀不可不理。