𠵱家有好多車主都鍾意DIY，例如換風隔、火嘴、頭燈同清洗蝴蝶瓣等等；不過部份車主響拆除螺絲時，可能會因為唔小心而掉進引擎室內，呢啲位置大多係難以伸手入內撿拾嘅地方，加上部份汽車嘅車底裝有導風板，如果要取出螺絲或細小零件時，可能要勞師動眾去拆除底板才可；而今日為大家介紹一支撿拾物件用嘅不求人，就最啱大家喺呢個時候用喇！呢支不求人長約3尺多，外管係用彈弓圈製成，內裏有三片軟身鐵片，可以屈曲至唔同角度及形狀，而喺把手位更有一個類似針筒嘅伸縮掣，只要將之按下，不求人另一端就會伸出三個細爪，以便撿拾細小嘅物件。
而呢個爪形不求人除可撿拾螺絲外，重可以撿拾連磁石都攝取唔起嘅非金屬物件；另外，筆者重發現呢支不求人，可用作檢查引擎室內一啲難以伸手入內檢查嘅螺絲位，吓睇螺絲有否鬆脫㖭！呢支不求人並唔係響汽車用品店發售，而係喺深水埗鴨寮街嘅各大電子零件店出售，售價僅$10左右，同時更備有金屬爪或磁石兩款，可謂悉隨尊便㗎！