羅嘉良早排同朋友飲完嘢撞車，之後不顧而去，搞到好大件事，不過啲人最想知嘅，梗係當時同佢一齊嘅女仔係邊個？有傳係宣萱，又有人話係佘詩曼，但阿佘就發毒誓否認咗。宣萱一向都同嘉良好老友，佢就話唔怕緋聞，一於繼續friend落去。
馮仁昭八到單嘢，話說嘉良撞車冇幾耐之前，佢去海港城I.T幫襯沈嘉偉買衫，左揀右揀之後，攞咗大堆衫去櫃枱畀錢，但畀錢之前，佢突然問售貨員係咪I.T卡有折，售貨員答佢話有，嘉良就叫個售貨員幫佢keep住啲衫，過幾日會有人幫佢嚟找數。
幾日後的確有人幫嘉良買衫，嗰個就係宣萱！原來沈嘉偉老婆邱淑貞好念舊，所以特別優惠部份藝人有八折，卒之宣萱就以八折幫嘉良買咗批衫，嘉良都算幾知慳識儉啦。
古天樂同鄭秀文（Sammi）九九年拍劇集《寵物情緣》時，傳過緋聞。呢排Sammi同古仔拍新戲《百年好合》，一齊去內地峨嵋山拍外景，又傳緋聞。噚日有報道話Sammi喺峨嵋山成日入古仔嘅酒店房談心。報道又話Sammi大前日去古仔位於京士柏山嘅豪宅，一齊預祝聖誕。之後，Sammi坐古仔架保母車走。不過，古仔噚日喺電話度就否認話：「唔回應呀。」
沈殿霞同個女欣宜噚日喺灣仔演藝學院綵排舞台劇《麗花皇宮2002》，肥姐重教第一次做舞台劇嘅欣宜，如果唔記得咗啲動作，可以喺台上面依音樂擺動，千祈唔好做啲古靈精怪嘅動作。肥姐睇住欣宜綵排，佢話：「我覺得佢表現中規中矩，仍要努力。欣宜最近飲菜湯減肥，都減咗八磅。」而欣宜就話：「爹哋（鄭少秋）聽晚（即今晚）會嚟捧場。」
張鎧潼俾《壹本便利》選為「嘔飯王」新人第二位，佢前晚經過金鐘港島香格里拉酒店，佢話遲啲有個活動要表演呼拉圈，所以專程要買個呼拉圈練習。記者叫佢即席示範，佢立刻喺酒店大堂扭吓扭吓咁。之後又自爆試過有年聖誕節，佢個前男友突然向佢求婚，令佢好鬼難忘喎。
麥浚龍（Juno）噚日去小西灣出席活動，只見Juno心口掛咗一個十字架同一個玉觀音（紅圈示），原來Juno因為去將軍澳新電視城，所以專登戴一條玉觀音嚟辟邪，Juno話：「因為新電視城𠵱家重係冇乜人氣，所以戴住嚟辟邪，都係求安心啫。」估唔到Juno年紀輕輕，都咁迷信喎！
陳伶俐噚日去何文田出席活動，見佢同啲細路仔影合照都不知幾開心，原來佢同老公林敏驄都好鍾意細路仔，佢老公重同佢講最好生多幾個仔女。陳伶俐話呢幾日開始懷疑自己又有咗BB，兼且佢阿媽同佢講夢見佢有咗BB，陳伶俐話如果真係有咗，就當係送畀老公一份大嘅聖誕禮物。