【本報訊】《基本法》第二十三條立法的諮詢期剛結束，基本法委員會成員譚惠珠昨一方面呼籲社會冷靜，另方面卻堅持反對立法的人「唔配做中國公民」，更把社會分化歸咎於傳媒斷章取義。立法會法律界代表吳靄儀批評譚惠珠繼續把反對派打成敵人，對事件發展有害無益，「如果佢一早冷靜，一早就唔應該講呢啲嘢。」
大律師公會主席梁家傑日前表示，在二十三條諮詢過程中，為譚惠珠「不支持二十三條立法就不配做中國人」的言論感到憤怒，認為政府應該「鬧吓譚惠珠」。
譚惠珠昨午出席沙田聖誕藝墟嘉年華時，反駁梁家傑並澄清說：「我話中國嘅憲法裏面，中國公民係有責任保障國家嘅利益同安全，因此如果你係中國公民，你又唔去支持立法，咁你就唔配嘞，我係講公民，我唔係講中國人。」
她又補充，只是原則性完全反對二十三條立法的人，不配當中國公民，而對立法建議提出質疑的人則不包括在內。譚惠珠又說，希望社會冷靜，讓政府咀嚼和消化意見，冷靜祥和地考慮問題：「我自己就老早冷靜咗落嚟，我已經老早進入冷卻期。」
對於有指二十三條的討論，把社會推向兩極化，譚惠珠把責任歸咎於傳媒：「我哋有一個好大嘅缺憾，就係我哋係經過傳媒同埋第三者去聽對方講乜，可能係斷章取義，可能冇全篇睇到。」
對於譚惠珠的言論，在家中度聖誕的梁家傑回應說：「咁我唔好回應囉，由得佢（爭論）喺呢度終止。」
身兼「基本法二十三條關注組」成員的吳靄儀則認為，根本毋須在「中國公民」和「中國人」間糾纏，因為譚惠珠說話的重點在於「唔配」，是辱罵他人的字眼。
吳靄儀說：「問題係政府究竟立乜嘢法，如果我反對任何建議，就話我唔肯負上維護國家安全嘅責任，就唔配做中國公民，咁係唔符合邏輯嘅。」她指譚惠珠的說話令人憤怒，令社會更加分化：「我一批評你，你就話我『唔配』，你重講乜嘢冷靜啫？」
民主黨前主席李柱銘認為：「作為中國公民，更加應該睇清楚中國憲法第三十一條，有關設立特別行政區嘅條文，更加應該話畀香港政府知，唔好做破壞中英聯合聲明嘅事，咁樣做落去只會害埋祖國。」
民間人權陣線召集人蔡耀昌則希望譚惠珠停止上綱上線：「譚惠珠如果真係要一個冷靜討論，應該道歉同收回佢嘅言論，咁至係理性討論。」