話咁快又到年尾，都係時候回顧一下2002年本港車壇發生過嘅事；今年經濟雖然唔係太好，但仍有不少新車款推出，再加上部份車款減價促銷，全部都大收旺場，而最受注目嘅當然係一場細車同MPV嘅市場爭奪戰啦！查實，值得回顧嘅車壇大事，又豈止得十件事咁少呢！但由於篇幅所限，亞Mark諗咗好耐先揀到以下十件事，不如𠵱家一齊嚟重溫吓啦！
記者：Mark哥
2001年，各大車廠分別派出七人車參加市場爭奪戰，而且重互有斬獲；但到咗2002年，各大車廠嘅代表又輪到細車，當中包括有本田Jazz、日產March、萬事得Mazda2、歐寶Corsa、福士Polo，以及剛啱響12月才抵港推出嘅福特Fiesta，搞到整個汽車市場變得熱鬧起來，單以成績嚟講，暫時可以肯定本田Jazz能夠率先跑出。不過，小車嘅興旺亦證明咗香港汽車市場，又開始起變化喇！事關乜都要講求經濟效益嘛！
亞Mark近呢幾年，好耐都無見過新車會出現搶購潮，但響2002年至抵埗出牌嘅新一代MiniCooper，就吸引咗唔少車迷注意，訂車後快者都要等半年至有車交，至於頂級手波版嘅CooperS更加受車迷歡迎；以今時今日嘅經濟環境嚟講，能夠有如此佳績，簡直可以「強」嚟形容啦！
備受車迷注目嘅林寶堅尼Murcielago超級跑車，雖然售價接近三百萬，但響呢個經濟咁艱難嘅時候，幾百萬嘅超級跑車依然供不應求，可見林寶堅尼果然魅力不凡，而香港嘅Quota亦已經賣晒，真係你都咪話唔厲害！
一眾車迷期待已久嘅城市小車Smart，由於一直未有右軚版供應，搞到唔少有興趣嘅車迷，都迫住要買改軚嘅水貨Smart。即使廠方已經有右軚版推出，但唔知點解一直都未能正式引入香港市場；直至今年11月先至正式有Showroom。不過，亞Mark最欣賞係新車嘅發布大會，因為代理分別響金鐘太古廣場及數碼港，搞咗個大型記招同Party，跟住再搞埋Showroom開幕，然後成龍大哥又買咗部SmartCabrio&Passion，絕對稱得上係氣勢強勁㗎！
同樣備受車迷注目嘅萬事得Mazda6，未推出之前經已廣受車迷注意，推出之後反應亦都算唔錯，但可惜無預期中咁理想；無法啦，事關香港經濟疲弱，加上車價最低都要十六萬幾起，若想似當年一推出就賣好多車，其實都唔係一件容易嘅事。不過講真一句，以Mazda6嘅光芒，絕對有資格成為甚麼年度風雲車㗎！
2002年另一單轟動嘅車壇新聞，可以肯定係大發嘅香港代理權，將會轉手到皇冠車行，據講呢個係世界性策略；相信以皇冠車行嘅人力物力嚟講，要為大發開拓市場，相信一啲困難都無！至於新政策會係點？相信要等到2003年先知喇！
響今年嘅十月，設備齊全嘅日產Prairie家庭七人MPV率先減價，由十八萬多減至十四萬幾，因而吸引咗唔少用家選購；及後豐田代理實行你減我又減，將50部Picnic嘅售價減至唔使十四萬，即時令全城起哄，搞到連報紙都要登頭條，兼且重搞到有過千人抽嗰五十部新車㖭！從而可見家庭七人MPV市場嘅競爭係幾激烈呢！
今年車行有唔少人事變動，除原屬福特Marketing嘅JessicaChe，過檔到富豪之外，原任萬事得G.M.嘅LeonardCheng亦去咗福特做G.M.。不過，就連豐田代理嘅皇冠車行，內部亦出現人事變動，早前由營業部調咗去Marketing嘅GaryCheung，最近被調回營業部並升任為SalesDirector，而原任SalesDirector嘅GodfreyTsang，則調任MarketingDirector；但TsangSir近日突然請辭，離開服務多年嘅皇冠車行。唉！估唔到響呢一年內，車行人事變動真係有咁大，真可謂世事難料。
被視為車壇猛將之一嘅EddyWong，響今年中突然向已服務多年嘅富士代理意美汽車請辭，並轉投擁有愛快代理權嘅嘉信汽車，呢個消息當其時令好多人都覺得奇怪，點解Eddy突然會有如此決定呢？
另外，當Eddy正式入主Kingsway後，亦代表咗RaymondTang嘅離開，而原有嘅Marketing至今亦已面目全非。
2002年可以話係寶馬嘅減價年度，旗下嘅7系、5系及3系全部都減過價；先講頂級嘅7系，嗰批畀政府徵用完嘅「新車」，轉吓頭就平咗十幾個巴仙益班用家，跟住又輪到5系嘅520i減10%，到年尾又輪到3系Coupe同開篷版，𠵱家連316tiCompact都減埋一份。大家千祈唔好睇小佢嗰10%，因為講緊都係三、四萬以上，再加上寶馬汽車嘅質量保證，難怪愈來愈受歡迎啦！