睇政情版李八方寫「明年生肖旅行篇」，八方代董先生八卦，問過風水佬，認為他老先生明年依然犯太歲（犯太歲都會雙春兼重犯，真離奇），是以適宜在西南方位佈以粉紅色物件去化解一下。八方則建議老人家為港人福祉，最好出年七月去大西北，聖誕節去北歐走一圈。
生肖旅遊真係咁靈？既然如此，董先生的愛將不妨一試。保安局長瞓身推銷廿三條，為確保不會為山九仞，功虧一簣，有負支持者公開褒揚「女中豪傑」的期望，保安局長應該往江澤民的家鄉遊覽一下。在揚州那個「二十四橋明月夜，玉人何處教吹簫」的主席景點逗留，吸收一下國家最高領導人的「靈氣」（應該有吧，甚至會比英皇陳伯更靈更強）。二十四橋，廿三條，相差一線，唔算大纜絞唔埋。過了橋，抽埋板，全方位壓倒民意，明年過硬廿三條。
保安局長的Twins23拍檔律政司長，也有旺八字好去處。力推廿三條火速上馬的詩姐，到拉斯維加斯玩廿一點應該大利運程。如果嫌遠，過澳門一樣掂。但何厚鏵強勢當道，食住老董個勢，詩姐這個馬仔，去到賭場，記住信邪，偷偷帶把刀，只要心有廿三，手上便有廿一，心有冇鬼都會大有斬獲，旺到冇人信。