早前，我哋談過新世代嘅另類燃料車輛，應係使用氫氣嘅燃料電池（FuelCell）車種，呢項發展隨着豐田同本田燃料電池車輛嘅推出，而獲得確定。
呢兩間日本車廠已同時響本月2日，推出燃料電池車輛，先以租賃形式給予日本政府部門使用；其中本田嘅燃料電池車FCX（右圖）可坐4人，先以月租80萬日圓租予內閣辦公廳，租約為期一年；而豐田嘅FCHV（下圖）則可載5人，並租予4個日本政府部門，租約為期30個月，月租120萬日圓。租賃價錢絕不便宜，可見燃料電池車輛嘅開發成本甚高。另外，兩間車廠都同時響12月2日，於美國進行燃料電池車輛交收儀式，本田先交5部FCX到洛杉磯市政府，而豐田則於同日將兩部FCHV交到兩間加州大學。
燃料電池車輛以氫氣做燃料，排出水份同熱氣，完全不產生有害廢氣；但係呢類新一代環保車輛若要普及，務必先解決氫氣供應，現時日本有3間氫氣補給站，一般相信要將整個氫氣供應網搞妥，需時大約10年。而除豐田及本田外，研究燃料電池車輛嘅車廠包括有平治、福特、萬事得及美國通用。
文：陳自齊