上個禮拜五拓荒者作客勇士完場後，勇士前鋒米爾斯同拓荒者嘅威爾斯大打出手，結果俾NBA分別罰停賽三場同兩場，不過據我求大俠所知，呢單嘢點只打交咁簡單。
話說米爾斯同威爾斯「埋牙」後怒火難消，竟糾黨尋仇；佢將自己架車泊正喺拓荒者嘅巴士前面，跟住同班𡃁圍住架巴士，喊打喊殺，嚇到班拓荒者班球員全部唔敢落車，十足黑社會講數咁款。
咪睇拓荒者班球員平時喺球場上打慣爛仔波，點知今次撞正一班比佢哋更爛仔更惡嘅「陀地」，即刻俾人嚇窒，縮晒喺架巴士裏面，更要勞動警方護送先至甩難，唔勻真係一物治一物嘞。
今日係聖誕節，我求大俠喺度同大家講聲聖誕快樂先。不過，有車人士就要小心駕駛，唔好好似紐卡素球員咁樂極生悲！喺兩星期前因超速被罰款嘅戴亞，前日又開快車出事撞橋，佢個人就冇事，但架百幾萬港銀嘅法拉利就報銷。至於中場阿古拿喺紐記聖誕派對後醉酒駕駛，被罰停牌兩年兼罰款一千鎊（約一萬二千港元）㖭！
外號「黑貓」嘅新特蘭目前喺降班漩渦掙扎，但估唔到首先跳船嘅係名不經傳嘅法國前鋒貝利安。貝利安喺十八個月前先至由康城免費轉會新特蘭，一直上陣機會唔多，點知佢竟然拒絕同新特蘭續約，重放風話希望可以喺一月轉會市場重開時走人，重有傳曼聯都對佢有興趣，真係無奇不有！
利物浦呢排成績麻麻，重可能有主力利斯缺陣一年㖭！話說利斯要喺出年一月八日開始要返挪威服兵役一年，本年佢可以申請延遲服役，但點知佢媽媽遲申請得滯過咗限期。𠵱家利物浦同佢嘅經理人都正在盡辦法求情，因為學利斯媽媽話齋：「要利斯喺呢個時候服役，將會破壞佢未來十年嘅事業。」
國米今屆多咗個基斯普，結果前鋒過盛，令上屆表現唔錯嘅雲杜拿冇得踢，就算最近有韋利同基斯普受傷，仍然搵收埋喺倉底好耐嘅卡隆出嚟，擺明雲杜拿係咁先，果然近日真係傳出佢一月會返去兩屆之前效力過嘅阿特蘭大救亡。喺意大利國家隊前鋒成日都係韋利、恩沙基，冇乜新血，明明有好人才都唔畀機會佢哋，真係嘥料。
逢周一至周五見報